కన్నడ సినిమా స్థాయిని పెంచిన సినిమాల జాబితాలో ‘కాంతార’ ఒకటిగా కనిపిస్తుంది. గతంలో కన్నడ ఇండస్ట్రీ నుంచి భారీ బడ్జెట్ సినిమాలు వచ్చాయి. వందల కోట్ల వసూళ్లను తెచ్చాయి. అయితే ‘కాంతార’ పరిస్థితి వేరు. ఈ సినిమా కేవలం 16 కోట్ల బడ్జెట్ తో రూపొందింది. అప్పటికి రిషభ్ శెట్టికి ఇతర భాషల్లో అంతగా ఫాలోయింగ్ కూడా లేదు. తెలుగులో కూడా అతను పెద్దగా తెలియదు. అలాంటి రిషభ్ శెట్టి చేసిన ఈ సినిమా సంచలనం సృష్టించింది.
కేవలం 16 కోట్లతో నిర్మించిన ఈ సినిమా, దాదాపు 450 కోట్ల వసూళ్ల వరకూ సాధించింది. అలాంటి ఈ సినిమాకి సీక్వెల్ వస్తే బాగుంటుందని అంతా అనుకున్నారు. అయితే రిషభ్ శెట్టి మాత్రం ప్రీక్వెల్ ను సెట్ చేశాడు. చాలా రోజులుగా ఈ సినిమా షూటింగు జరుపుకుంటోంది. ‘కాంతార’ చిన్న బడ్జెట్ సినిమా కావడం వలన, గ్రాఫిక్స్ ను పెద్దగా ఉపయోగించలేదు. ఈ సారి మాత్రం వీఎఫ్ ఎక్స్ ఒక రేంజ్ లో ఉంటుందని అంటున్నారు. అందుకోసం కోసం భారీ బడ్జెట్ నే కేటాయించారట.
ఈ సినిమా చిత్రీకరణ ఎప్పుడు పూర్తవుతుందా .. ఎప్పుడు థియేటర్లకు వస్తుందా అనే ఆసక్తితో అభిమానులు ఎదురుచూస్తున్నారు. ఈ సినిమా చిత్రీకరణ దాదాపు పూర్తయిందని సమాచారం. మరో 20 రోజులలో టాకీపార్టు మొత్తం పూర్తవుతుందని అంటున్నారు. ఆ వెంటనే పోస్టు ప్రొడక్షన్ పనులను మొదలుపెడతారని టాక్. వచ్చే వేసవిలో ఈ సినిమాను పాన్ ఇండియా స్థాయిలో రిలీజ్ చేయనున్నారని చెబుతున్నారు. ఈ సినిమా మరో సంచలనం సృష్టిస్తుందేమో చూడాలి.
