ఐపీఎల్ లో నేడు జరిగిన మ్యాచ్ లో రాయల్ ఛాలెంజర్స్ బెంగుళూరుపై కోల్ కతా నైట్ రైడర్స్ గెలుపొందింది. తొలుత బ్యాటింగ్ చేసిన కోల్ కతా 200 పరుగులు చేయగా లక్ష్య సాధనలో బెంగుళూరు 20 ఓవర్లలో 8 వికెట్లు కోల్పోయి 179 పరుగులే చేసింది. కోల్ కతా ప్లేయర్లలో జేసన్ రాయ్, నితీష్ రానా, వెంకటేష్ అయ్యర్ బ్యాటింగ్ లోనూ…. వరుణ్ చక్రవర్తి, ఆండ్రీ రస్సెల్, సుయాష్ శర్మ బౌలింగ్ లోనూ రాణించారు.
బెంగుళూరు చిన్న స్వామి స్టేడియంలో జరిగిన ఈ మ్యాచ్ లో ఆర్సీబీ టాస్ గెలిచి బౌలింగ్ ఎంచుకుంది. కోల్ కతా ఓపెనర్లు తొలి వికెట్ కు 83 పరుగులతో గట్టి పునాది వేశారు. జగదీషన్ నెమ్మదిగా ఆడి 29 బంతుల్లో 27 పరుగులు చేసి అవుట్ కాగా ఆ కాసేపటికే మరో ఓపెనర్ జేసన్ రాయ్-56 (29బంతుల్లో 4 ఫోర్లు, 5 సిక్సర్లు) కూడా వెనుదిరిగాడు. వెంకటేష్ అయ్యర్ 31రన్స్ సాధించగా, కెప్టెన్ నితీష్ రాణా 21 బంతుల్లో 3ఫోర్లు, 4 సిక్సర్లతో 48 పరుగులు చేసి అవుట్ కాగా, ఆండ్రీ రస్సెల్ (1) మరోసారి విఫలమయ్యాడు. తర్వాత రింకూ సింగ్ 10 బంతుల్లో 2 ఫోర్లు, 1 సిక్సర్ తో 18; డేవిడ్ వీస్ 3 బంతుల్లో రెండు సిక్సర్లతో 12 పరుగులతో అజేయంగా నిలిచాడు. దీనితో నిర్ణీత 20ఓవర్లలో 5 వికెట్లు కోల్పోయి 200పరుగులు చేసింది. బెంగుళూరు బౌలర్లలో హసరంగ, విజయ్ కుమార్ చెరో రెండు; సిరాజ్ ఓ వికెట్ పడగొట్టారు.
బెంగుళూరు లో కెప్టెన్ విరాట్ కోహ్లీ-54; మహిపాల్ లామ్రోర్-34; దినేష్ కార్తీక్-22; డూప్లెసిస్-17 పరుగులు చేశారు. కోల్ కతా బౌలర్లో వరుణ్ చక్రవర్తి 3; సుయాష్ శర్మ, ఆండ్రీ రస్సెల్ చెరో రెండు వికెట్లు సాధించారు.
వరుణ్ చక్రవర్తికి ప్లేయర్ అఫ్ ద మ్యాచ్ లభించింది.
