ఐకాన్ స్టార్ అల్లు అర్జున్ – క్రియేటివ్ డైరెక్టర్ సుకుమార్ కాంబినేషన్లో రూపొందుతున్న పాన్ ఇండియా మూవీ పుష్ప. అల్లు అర్జున్, సుకుమార్, దేవిశ్రీప్రసాద్ కాంబినేషన్లో వచ్చిన ఆర్య, ఆర్య 2 సినిమాలోని పాటలు ఎంత పాపులర్ అయ్యాయో తెలిసిందే. ఇప్పుడు ఈ కాంబినేషన్లో మూవీ రాబోతుందని తెలిసినప్పటి నుంచి ఆల్బమ్ అదిరింది అనేలా ఉంటుందనే టాక్ వచ్చింది. ఇక ఈ రోజు ఈ సినిమా నుంచి ‘దాక్కో దాక్కో మేక.. అంటూ సాగే లిరికల్ వీడియో సాంగ్ ను రిలీజ్ చేశారు. అంచనాలకు తగ్గట్టుగా ఈ పాటకు రాక్ స్టార్ దేవిశ్రీప్రసాద్ ఇచ్చిన మాస్ బీట్ అదిరింది.
“వెలుతురు తింటది ఆకు.. ఆకును తింటది మేక.. మేకను తింటది పులి.. ఇది కదరా ఆకలి.. పులిని తింటది చావు.. చావును తింటది కాలం.. కాలాన్ని తింటది కాళీ… ఇది మహా ఆకలి” అంటూ సాహిత్య చిచ్చరపిడుగు చంద్రబోస్ ఈ పాటలో ఫిలాసఫీ చెప్పారు. ఇక ఈ మాస్ బీట్ కు తగ్గట్టుగా అల్లు అర్జున్ డ్యాన్స్ కూడా బాగుంది. మాస్ ఆడియన్స్ ను ఈ పాట విశేషంగా ఆకట్టుకుంటుంది. ఈ పాటను ఇలా రిలీజ్ చేశారో లేదో.. అలా రికార్డుల మోత మోగ్రించడం మొదలుపెట్టింది. ఈ పాట రిలీజ్ అయిన 18 నిమిషాల్లోనే ఫాస్టెస్ట్ 100కె లైక్స్, 46 నిమిషాల్లో 200 కె సాధించిన పాటగా ఆల్ టైమ్ రికార్డ్ క్రియేట్ చేసింది.
ఈ మూవీని భారీ బడ్జెట్‌తో మైత్రీ మూవీ మేకర్స్, ముత్యంశెట్టి మీడియా సంయుక్తంగా నిర్మిస్తున్నాయి. ఎర్రచందనం స్మగ్లింగ్ నేపధ్యంతో రూపొందుతోన్న పుష్ప చిత్రాన్ని రెండు భాగాలుగా విడుదల చేయనున్నారు. పుష్ప ఫస్ట్ పార్ట్ ను క్రిస్మస్ కానుకగా డిసెంబర్ లో విడుదల చేయనున్నారు.
