నాని తన కెరియర్ ను మొదలుపెట్టిన దగ్గర నుంచి మంచి దూకుడు చూపిస్తూ వచ్చాడు. ఏడాదికి రెండు .. మూడు సినిమాలు తన వైపు నుంచి థియేటర్స్ కి వెళ్లేలా చూసుకున్నాడు. అలాంటి నాని ఈ మధ్య కాలంలో కాస్త స్పీడ్ తగ్గించాడనే చెప్పాలి. కంటెంట్ విషయంలో కసరత్తుకు ఆయన మరింత సమయం తీసుకుంటున్నాడనే చెప్పాలి. అలా ఆయన చేసిన సినిమానే ‘సరిపోదా శనివారం’. వివేక్ ఆత్రేయ దర్శకత్వంలో రూపొందిన ఈ సినిమా, ఈ రోజున ప్రేక్షకుల ముందుకు వచ్చింది.
టైటిల్ నుంచే ఈ సినిమా ఆడియన్స్ లో ఆసక్తిని రేకెత్తించింది. కంటెంట్ ఏమైవుంటుందా అని అంతా వెయిట్ చేస్తూ వచ్చారు. ఈ సినిమాలో హీరోకి కోపం ఎక్కువ .. అయితే ఆ కోపాన్ని అతను వెంటనే చూపించడు .. శనివారం వరకూ వెయిట్ చేస్తాడు. అప్పటివరకూ ఆగడం ఎందుకంటే .. అది తల్లికిచ్చిన మాట. అలా మాట ఎందుకిచ్చాడంటే, థియేటర్ కి వెళ్లి సినిమా చూడవలసిందే. అయితే తల్లికిచ్చిన ఆ మాటను నిలబెట్టుకోవడం కోసం ఆయన ఎన్ని ఇబ్బందులు పడ్డాడనేదే కథ.
హీరోకి ఒక లక్షణం ఉంటుంది. తనకళ్ల ముందు ఎవరికైనా అన్యాయం జరిగితే ఆ మనిషిని తన మనిషిగా భావిస్తాడు .. ఆ సమస్యను తనదిగా భావించి పోరాడతాడు. ఇక విలన్ విషయానికొస్తే ఒకరిపై కోపం వస్తే .. మరొకరిపై చూపించే టైపు. ఈ రెండు విభిన్నమైన మనస్తత్త్వాల మధ్య ఈ కథ నడుస్తూ ఉంటుంది. వివేక్ ఆత్రేయ ఈ కథను రాసుకున్న తీరు .. దానిని తెరపై ఆవిష్కరించిన విధానం ఆడియన్స్ ను ఆకట్టుకుంటుంది. ‘అంటే .. సుందరానికీ’ సినిమాతో నాని అభిమానులను నిరాశపరిచిన ఈ దర్శకుడు, ఈ సినిమాతో నానీకి హిట్ ఇచ్చాడనే చెప్పాలి.
