ప్రభాస్ పాన్ ఇండియా స్టార్ గా తన ప్రభంజనం కొనసాగిస్తున్నాడు. ‘రాధే శ్యామ్’ .. ‘ఆదిపురుష్’ వంటి పాన్ ఇండియా సినిమాలు అభిమానులను నిరాశ పరిచాయి. అయితే ‘సలార్’ ఆయన అభిమానులకు ఉత్సాహాన్ని ఇచ్చింది. ఆ తరువాత వచ్చిన ‘కల్కి’ కూడా వసూళ్ల పరంగా కొత్త రికార్డులను క్రియేట్ చేసింది. ఇక ఇప్పుడు ప్రభాస్ నుంచి రావడానికి ‘రాజా సాబ్’ సినిమా రెడీ అవుతోంది. వినోదమే ప్రధానంగా మారుతి రూపొందిస్తున్న సినిమా ఇది.
ఈ నేపథ్యంలోనే హను రాఘవపూడి దర్శకత్వంలో ప్రభాస్ ఒక సినిమా చేయనున్నట్టుగా వార్తలు వచ్చాయి. ఆ తరువాత అది నిజమేనని నిర్ధారణ అయింది. ప్రస్తుతం ఈ సినిమాకి సంబంధించిన సన్నాహాలు జరుగుతున్నాయి. ఈ సినిమా ఎప్పుడు సెట్స్ పైకి వెళుతుందా అని ఫ్యాన్స్ వెయిట్ చేస్తున్నారు. ఈ నెల 17వ తేదీన ఈ ప్రాజెక్టు పూజా కార్యక్రమాలను జరుపుకోనుందని అంటున్నారు. అధికారికంగా ఈ విషయాన్ని ప్రకటించనున్నట్టు తెలుస్తోంది.
ఈ కథ యుద్ధం నేపథ్యంలో నడవనుందని అంటున్నారు. ‘ఫౌజి’ అనే టైటిల్ ను పరిశీలిస్తున్నారు. మైత్రీ మూవీ మేకర్స్ వారు భారీ బడ్జెట్ తో ఈ సినిమాను నిర్మించనున్నారు. విశాల్ చంద్రశేఖర్ ఈ సినిమాకి సంగీతాన్ని సమకూర్చుతున్నాడు. ‘సలార్’, ‘కల్కి’ వంటి భారీ విజయాలతో ప్రభాస్ దూసుకెళుతున్నాడు. ఇక హను రాఘవపూడి ‘సీతా రామం’తో సంచలన విజయాన్ని అందుకున్నాడు. అందువలన ఈ ఇద్దరి కాంబినేషన్లో రానున్న సినిమాపై అంచనాలు భారీగానే ఉన్నాయి.
