బ్రిటన్ రాణి ఎలిజబెత్ 2 కన్నుమూశారు. ఆమె వయసు 96 ఏళ్లు. బ్రిటన్ చరిత్రలో అత్యధిక కాలం రాణిగా కొనసాగి ఆమె చరిత్ర సృష్టించారు. 76 ఏళ్లుగా బ్రిటన్కు రాణిగా కొనసాగుతున్నారు. 2015 వరకు ఈ రికార్డు ఆమె నానమ్మ క్వీన్ విక్టోరియా పేరుతో ఉండేది. క్వీన్ ఎలిజబెత్ హయాంలో బ్రిటన్కు 15 మంది ప్రధానులు పనిచేశారు. రాణి ఎలిజబెత్ 2 అస్తమయంతో బ్రిటన్లో ఒక శకం ముగిసినట్లైంది. కొంత కాలంగా అనారోగ్య సమస్యలు ఎదుర్కొంటున్న క్వీన్ ఎలిజబెత్ 2.. స్కాట్లాండ్లోని బాల్మోరల్ రాజసౌధంలో ఉంటూ చికిత్స తీసుకుంటున్నారు. అక్కడ చికిత్స పొందుతూ తుది శ్వాస విడిచారు. ‘రాణి పీస్ఫుల్గా మరణించారు’ అని బాల్మోరల్ ప్యాలెస్ వర్గాలు వెల్లడించాయి.
రాణి ఎలిజబెత్ను గత ఏడాది అక్టోబర్ నుంచే ఆరోగ్య సమస్యలు వేధిస్తున్నాయి. నడవడం, నిలబడటం కూడా అతి కష్టంగా చేస్తున్నారు. దీంతో నాటి నుంచి అధికారిక కార్యక్రమాలకు దూరంగా ఉంటున్నారు. అయితే, రెండు రోజుల కిందటే బ్రిటన్ ప్రధానిగా ఎన్నికైన లిజ్ ట్రస్ స్కాట్లాండ్కి వెళ్లి రాణి ఎలిజబెత్ను కలుసుకున్నారు. ఆమె ఆశీస్సులు తీసుకొని బ్రిటన్ ప్రధానిగా బాధ్యతలు చేపట్టారు.
రాణి ఎలిజబెత్.. బుధవారం సీనియర్ మంత్రులతో వీడియో కాన్ఫరెన్స్ ద్వారా పాల్గొనాల్సి ఉన్నప్పటికీ డాక్టర్ల సూచన మేరకు అందుకు దూరంగా ఉన్నారు. ఆమె ఆరోగ్యం క్షీణించిందని వార్తలు రావడంతో కుటుంబసభ్యులంతా లండన్ నుంచి బాల్మోరల్ ప్యాలెస్కు చేరుకున్నారు. చివరి గంటల్లో రాణి వెంటే ఉన్నారు.
క్వీన్ ఎలిజబెత్ అసలు పేరు అలెగ్జాండ్ర మేరి. 25 ఏళ్ల ప్రాయంలో బ్రిటన్ సహా 14 కామన్వెల్త్ దేశాలకు ఆమె రాణిగా బాధ్యతలు చేపట్టారు. 1952లో తండ్రి అస్తమయం తర్వాత వారసత్వంగా రాణిగా బాధ్యతలు తీసుకున్నారు. రెండో ప్రపంచ యుద్ధ కాలంలో ఆమె ఇంట్లోనే ఉండి చదువుకున్నారు. రాణి ఎలిజబెత్ భర్త పేరు ఫిలిప్. ఆయన 2021లో కన్నుమూశారు. ఈ దంపతులకు నలుగురు సంతానం.
