మెగా పవర్‌స్టార్ రామ్ చరణ్, సెన్సేషనల్ డైరెక్ట‌ర్ శంకర్ కాంబినేషన్లో ఓ భారీ పాన్ ఇండియా మూవీ రూపొందుతోన్న విషయం తెలిసిందే. ప్రముఖ నిర్మాణ సంస్థ శ్రీ వెంక‌టేశ్వ‌ర క్రియేష‌న్స్ బ్యాన‌ర్‌ పై దిల్‌రాజు, శిరీశ్ సంయుక్తంగా ఈ చిత్రాన్ని నిర్మిస్తున్నారు. ఈ భారీ పాన్ ఇండియా మూవీ షూటింగ్ తొలి షెడ్యూల్ పూర్త‌య్యింది. రీసెంట్‌గా స్టార్ట్ చేసినప్పటికీ ముందుగా అనుకున్న ప్లాన్ ప్ర‌కారం ఈ షెడ్యూల్ చిత్రీక‌ర‌ణ‌ను పూర్తి చేశారు. పూనే, స‌తారా, పాల్‌ట‌న్ ప్రాంతాల్లో స్పెష‌ల్ సీక్వెన్స్‌ ల‌ను చిత్రీక‌రించారు.
శంకర్ అన‌గానే భారీత‌నం ఉన్న సినిమాలే గుర్తుకు వ‌స్తాయి. వాటికి ధీటుగా, గ్రాండ్‌గా, స్టైలిష్‌గా చిత్రీక‌రించిన ఈ సన్నివేశాలు సినిమాకు హైలైట్ అంశాలుగా నిలుస్తాయని యూనిట్ చెబుతోంది. సినిమా కాస్ట్ అండ్ క్రూను డైరెక్ట‌ర్ శంకర్ ముందుకు న‌డిపిన విధానం, ఔట్‌పుట్‌ పై మేక‌ర్స్ చాలా హ్య‌పీగా ఉన్నారు. ఈ మూవీలో స‌రికొత్త పాత్ర‌లో రామ్‌చ‌ర‌ణ్‌ను శంకర్ ప్రెజంట్ చేయ‌బోతున్నారు. ఇటు సామాన్య ప్రేక్ష‌కులు, అటు మెగాభిమానుల అంచనాల‌ను మించి ఈ సినిమా ఉంటుంది.
రామ్‌చ‌ర‌ణ్ కు హీరోగా 15వ చిత్రం.. దిల్ రాజుకు 50వ చిత్రం కావడం విశేషం. త‌న బ్యాన‌ర్‌లో మ‌రే సినిమాకు పెట్ట‌నంత భారీ బ‌డ్జెట్‌తో ఇండియ‌న్ సినిమాల్లోనే ల్యాండ్ మార్క్ మూవీలా నిలిచిపోయేలా దిల్ రాజు, శిరీశ్ ఈ చిత్రాన్ని నిర్మిస్తున్నారు. పాన్ ఇండియా మూవీగా ప‌లు భాష‌ల్లో రూపొందుతోన్న ఈ సినిమా పై భారీ అంచ‌నాలు ఏర్ప‌డ్డాయి. కియారా అద్వానీ, జ‌యరామ్‌, అంజ‌లి, సునీల్, శ్రీకాంత్‌, న‌వీన్ చంద్ర త‌దిత‌రులు ఈ చిత్రంలో ప్ర‌ధాన పాత్ర‌లు పోషిస్తున్నారు. మ్యూజిక్ సెన్సేష‌న్ ఎస్‌.ఎస్‌.త‌మ‌న్‌ సంగీతం సార‌థ్యం వ‌హిస్తోన్న ఈ చిత్రంలో పాట‌ల‌ను రామ‌జోగ‌య్య శాస్త్రి, అనంత శ్రీరామ్ రాస్తుండ‌గా సాయి మాధ‌వ్ బుర్రా సంభాషణలు రాస్తున్నారు.
