ఇంగ్లాండ్ బౌలర్ టామ్ హార్ట్లీ ఏడు వికెట్లతో సత్తా చాటి ఇండియా బ్యాటింగ్ లైనప్ ను దెబ్బతీయడంతో తొలి టెస్టులో ఇంగ్లాండ్ 28 పరుగుల తేడాతో ఆతిథ్య జట్టుపై విజయం సాధించింది. ఐదు టెస్టు మ్యాచ్ ల సిరీస్ కోసం ఇంగ్లాండ్ జట్టు ఇండియాలో పర్యటిస్తోంది. హైదరాబాద్ ఉప్పల్ స్టేడియం తొలి టెస్టుకు ఆతిథ్యం ఇచ్చింది.
జనవరి 25 న ఆరంభమైన ఈ టెస్టులో ఇంగ్లాండ్ టాస్ గెలిచి బ్యాటింగ్ ఎంచుకుని తొలి ఇన్నింగ్స్ లో 246 పరుగులకే ఆలౌట్ అయ్యింది. కెప్టెన్ బెన్ స్టోక్స్ ఒక్కడే 70 పరుగులతో రాణించాడు. జడేజా, అశ్విన్ చెరో మూడు; బుమ్రా, అక్షర్ పటేల్ చెరో రెండు వికెట్లు పడగొట్టారు.
రవీంద్ర జడేజా-87; కెఎల్ రాహుల్- 86′ యశస్వి జైస్వాల్-80; అక్షర్ పటేల్-44; శ్రీకర్ భారత్-41 పరుగులతో రాణించడంతో ఇండియా తొలి ఇన్నింగ్స్ లో 436కు ఆలౌట్ అయి 190 పరుగుల ఆధిక్యం సంపాదించింది.
రెండో ఇన్నింగ్స్ లో ఇంగ్లాండ్ బ్యాట్స్ మెన్ ఓలీ పోప్ 196 పరుగులతో ధాటిగా ఆడడంతో ఆ జట్టు 420 పరుగులు చేసింది. డక్కెట్ 47; ఫోకస్-34; టామ్ హార్ట్లీ-34… కూడా రాణించారు. బుమ్రా-4; అశ్విన్-3; జడేజా-2; అక్షర్ ఒక వికెట్ పడగొట్టారు.
మ్యాచ్ విజయానికి 231 పరుగుల లక్ష్యంతో నేడు నాలుగో రోజు లంచ్ తరువాత బ్యాటింగ్ మొదలు పెట్టిన ఇండియా 42 పరుగుల వద్ద రెండు వికెట్లు (కెప్టెన్ రోహిత్ -39; శుభ్ మన్ గిల్-డకౌట్) వికెట్లు కోల్పోయింది. ఆ తరువాత వరుస వికెట్లు సమర్పించుకుంది. శ్రీకర్ భరత్-28; రవిచంద్రన్ అశ్విన్-28; కెఎల్ రాహుల్-22 మినహా మిగిలిన వారు విఫలం కావడంతో 202 పరుగులకే ఇండియా చాపచుట్టేసింది. టామ్-7; జో రూట్, జాక్ లీచ్ చెరో వికెట్ సాధించారు.
ఓలీ పోప్ కు ప్లేయర్ అఫ్ ద మ్యాచ్ దక్కింది.
రెండో టెస్ట్ మ్యాచ్ ఆంధ్ర ప్రదేశ్ లోని విశాఖపట్నం స్టేడియంలో ఫిబ్రవరి 2 న మొదలు కానుంది.
