Trial & Sword:
కక్షిదారు:-
సార్! ఇప్పుడు మన తక్షణ కర్తవ్యం ఏమిటి ?
న్యాయవాది:-
అన్ని తలుపులు మూసుకుపోయినప్పుడు కిటికీలు తెరవడమే.
క:-
కిటికీలు ముందే మూసుకుపోయాయి కదా సార్!
న్యా:-
అయ్యో! అలాగా ప్రత్యేక విమానంలో వచ్చేప్పుడు పైనుండి సరిగ్గా కనిపించక అలా అన్నాను…అన్ని తలుపులూ అలాగే ఉంటే…ఈ కత్తి కానీ…సుత్తి కానీ…చేత ధరించి…ప్రయత్నించండి.
క:-
సార్! మీరు గతంలో మెకానిక్కా? కార్పెంటరా?
న్యా:-
కర్మణ్యేవాధికారస్తే…
క:-
నా ఖర్మ నాకు వ్యాధికారస్తే…అర్థమయ్యింది సార్…
న్యా:-
సాధారణంగా తూర్పున సూర్యుడు ఉదయిస్తాడు. పడమట అస్తమిస్తాడు…
క:-
…ఈరోజు పడమట ఉదయించాడా?
న్యా:-
లేదు…ఈరోజు కూడా తూర్పునే ఉదయించాడు.
క:-
మరి నాకెందుకు చెబుతున్నారు?
న్యా:-
సాధారణ సూత్రాలనే నేను సాధారణంగా చెబుతూ ఉంటాను.
క:-
సార్! మనం ఈ కేసు గెలుస్తున్నామా?
న్యా:-
గెలిచేదంతా న్యాయం కాదు. ఓడినదంతా అన్యాయమూ కాదు. గెలుపులో ఓటమి; ఓటమిలో గెలుపు ఉండకపోవు.
క:-
మీరు చిన్నప్పటి నుండీ ఇలాగే మాట్లాడేవారా?
న్యా:-
ఎందుకు? స్పష్టంగా, తాత్వికంగా, కొటేషన్స్ తో మాట్లాడుతున్నాను కదా? అర్థం కాలేదా?
క:-
మనం ఓడిపోయి చాలా కాలమయ్యింది సార్.
న్యా:-
అవును. నాకు క్లారిటీ ఉంది. ఓటమిలో ఓరిమితో గెలుపును వెతుక్కుంటాను నేను.
క:-
మీరు ఖాళీ సమయంలో ఏమి చేస్తుంటారు?
న్యా:-
కొటేషన్లు ఎత్తి రాస్తుంటాను.
క:-
మాటలు కోటలు దాటుతాయి-చేతలు చేతులు ముడుచుకు కూర్చుంటాయి. మొరిగే కుక్క కరవదు. ఆశ లావు-పీక సన్నం. ఏమీలేని ఆకు ఎగెరెగిరి పడుతుంది. కంచు మోగునట్లు కనకంబు మోగదు సామెతలు ఎప్పుడన్నా ఎత్తి రాశారా?
ఇంతకూ నన్నోడించినందుకు మీ బిల్లు ఎంత సమర్పించుకోమంటారు?
న్యా:-
గంటకు ఇరవై అయిదు లక్షలు. రెండ్రోజుల్లో రెండు కొటేషన్లు ఎత్తి రాసినందుకు మరో ఇరవై లక్షలు అదనం. ప్లస్ జి ఎస్ టీ. ప్లస్ మా జూనియర్లకు చిల్లర ఖర్చులకు తలకు ఒక్కింటికి అయిదు లక్షల చొప్పున ఐదుగురికి…
క:-
సార్. మీరు మూర్తీభవించిన…
న్యా:-
పూర్ ఫెలో…మాట పూర్తీ చెప్పకుండానే…మాట పడిపోయినట్లుంది!
-పమిడికాల్వ మధుసూదన్
[email protected]
