ఆది సాయికుమార్, నువేక్ష హీరోహీరోయిన్లుగా న‌టిస్తోన్న చిత్రం ‘అతిధి దేవో భవ’. శ్రీనివాస క్రియేషన్స్ ప‌తాకం పై రాజాబాబు మిర్యాల, అశోక్ రెడ్డి మిర్యాల సంయుక్తంగా నిర్మిస్తున్నారు. పొలిమేర నాగేశ్వర్ ఈ చిత్రానికి దర్శకత్వం వహిస్తున్నారు. తాజాగా ఈ సినిమా నుండి మొద‌టి పాట‌గా ఓ ప్రేమ గీతాన్ని విడుదల చేశారు. ఈ పాట సంగీత ప్రియుల్ని అల‌రిస్తోంది. ‘బాగుంటుంది నువ్వు నవ్వితే’ అంటూ సాగే ఈ గీతానికి భాస్కర భట్ల సాహిత్యం అందించ‌గా లేటెస్ట్‌ సింగింగ్ సెన్సేషన్ సిద్ శ్రీరామ్, నూతన మోహన కలిసి ఈ పాటను ఆలపించారు.
శేఖర్ చంద్ర మంచి బాణీలు సమకూర్చారు. యూత్‌ని విప‌రీతంగా ఆకట్టుకుంటున్న ఈ పాట యూట్యూబ్‌లో దూసుకుపోతోంది. ఈ పాటతో సినిమా మీద అంచనాలు మ‌రింత పెరిగాయి. త్వరలోనే ఈ చిత్రానికి సంబంధించిన విడుదల తేదీని మేకర్స్ ప్రకటించబోతోన్నారు. ఈ సినిమాకు అమరనాథ్ బొమ్మిరెడ్డి కెమెరామెన్‌గా వ్యవహరిస్తున్నారు. కార్తీక్ శ్రీనివాస్ ఎడిటర్‌గా పని చేస్తున్నారు. ఓ విభిన్న కథతో వస్తున్న ఈ సినిమా ప్రేక్షకులకు ఖచ్చితంగా నచ్చుతుంది అని మేకర్స్ అంటున్నారు. సరైన సక్సెస్ కోసం ఎదురు చూస్తున్న ఆది సాయికుమర్ కు ఈ సినిమా విజయాన్ని అందిస్తుందని ఆశిద్దాం.
