దళితుల సామాజిక, ఆర్థిక హక్కులు కాపాడేందుకు, అలాగే వారికి ఎస్సీ హోదా కల్పించే విషయమై కేంద్ర ప్రభుత్వం అధ్యయనం చేస్తోందని కేంద్ర సామాజిక న్యాయం మరియు ఎంపవర్మెంట్ మంత్రి ఏ నారాయణ స్వామి వెల్లడించారు. లోక్సభలో వైసీపీ పార్లమెంటరీ చీఫ్ విప్, రాజమండ్రి ఎంపీ మార్గాని భరత్ రామ్ మాట్లాడుతూ దళితులకు ఎస్సీ హోదా కల్పించే విషయమై అధ్యయనం చేయడానికి ఒక కమిటీని ఏర్పాటు చేసిందా అని ప్రశ్నించారు. ఆ కమిటీ నిబంధనలు ఏమిటని సంబంధిత శాఖ మంత్రిని ప్రశ్నించారు. నేషనల్ కౌన్సిల్ ఆఫ్ దళిత క్రిస్టియన్స్ అలాగే ఇతరులు సుప్రీంకోర్టులో దాఖలు చేసిన కేసు యొక్క విధి, కమిటీకి ఎప్పటి వరకూ అధ్యయనానికి గడువు ఇచ్చిందని ఎంపీ భరత్ ప్రశ్నించారు. దీనిపై సంబంధిత కేంద్ర శాఖ మంత్రి నారాయణ స్వామి సమగ్ర వివరణతో ఎంపీ భరత్ కు లిఖితపూర్వక సమాధానం ఇచ్చారు.
ఆర్టికల్ 341 ప్రకారం కాలానుగుణంగా జారీ చేయబడిన రాష్ట్రపతి ఉత్తర్వుల ద్వారా షెడ్యూల్డ్ కులాలుగా ప్రకటించబడ్డాయని ఆ లేఖలో మంత్రి తెలిపారు. అయితే కొంతమంది రాష్ట్రపతి ఉత్తర్వుల ద్వారా అనుమతించబడిన వాటికి మించి ఇతర మతాలకు చెందిన కొత్త వ్యక్తులకు హోదా ప్రకారం ఎస్సీల యొక్క ప్రస్తుత నిర్వచనాన్ని పునఃపరిశీలించాలనే ప్రశ్నలు లేవనెత్తారని చెప్పారు. దీనికి విరుద్ధంగా అనేక ఇతర సమూహాలు కూడా దీనిని వ్యతిరేకించాయని తెలిపారు. అయితే ప్రస్తుత ఎస్సీ ప్రతినిధులు కొత్త వ్యక్తులకు ఎస్సీ హోదాను మంజూరు చేయడంపై అభ్యంతరం వ్యక్తం చేశారని చెప్పారు. అయితే ఇది సెమినల్, చారిత్రాత్మకంగా సంక్లిష్టమైన సామాజిక, రాజ్యాంగపరమైన విషయమని చెప్పారు. అందుకే సెక్షన్ 3 (60/1952) ద్వారా అందించబడిన అధికారాలను ఉపయోగించి కేంద్రప్రభుత్వం విచారణ కమిషన్ ను నియమించినట్టు తెలిపారు.
ఈ కమిషన్ ఛైర్పర్సన్ గా భారత మాజీ ప్రధాన న్యాయమూర్తి జస్టిస్ కేజీ బాలకృష్ణ, సభ్యులుగా విశ్రాంత ఐఏఎస్ అధికారి డాక్టర్ రవీంద్ర కుమార్, ప్రొఫెసర్ డాక్టర్ సుష్మా యాదవ్ (యూజీసీ సభ్యురాలు) నియమించినట్టు మంత్రి ఏ నారాయణ స్వామి తెలిపారు. ఈ కమిషన్ నిబంధనల ప్రకారం.. చారిత్రాత్మకంగా ఎస్సీలకు చెందిన వారమని చెప్పుకునే కొత్త వ్యక్తులకు షెడ్యూల్డ్ కుల స్థితిని బట్టి పరిశీలించడం, ప్రస్తుత ఎస్సీల జాబితాలో భాగంగా అటువంటి కొత్త వ్యక్తులను చేర్చడం వల్ల ప్రస్తుత ఎస్సీలపై వచ్చే చిక్కులను పరిశీలించడం, కేంద్ర ప్రభుత్వంతో సంప్రదించి దాని సమ్మతితో కమిషన్ సముచితమని భావిస్తే ఇతర సంబంధిత ప్రశ్నలను పరిశీలించడం జరుగుతుందని ఎంపీ భరత్ కు కేంద్ర మంత్రి ఏ నారాయణ స్వామి తెలిపారు. ఈ కమిషన్ ప్రధాన కార్యాలయం న్యూ ఢిల్లీలో ఉంటుందని, ఛైర్పర్సన్ బాధ్యతలు స్వీకరించిన తేదీ నుండి రెండు సంవత్సరాల వ్యవధిలో కమిషన్ తన నివేదికను సమర్పించాలని ఎంపీ భరత్ అడిగిన మరో ప్రశ్నకు సమాధానంగా కేంద్ర మంత్రి ఏ నారాయణ స్వామి తెలిపారు.
