మలయాళ ఇండస్ట్రీ ఇప్పుడు వరుస బ్లాక్ బస్టర్ హిట్లను నమోదు చేస్తూ వెళుతోంది. ఫిబ్రవరిలో వచ్చిన మూడు సినిమాలు సంచలన విజయాలను అందించాయి. ‘భ్రమ యుగం’ .. ‘ప్రేమలు’ .. ‘మంజుమ్మల్ బాయ్స్’ .. ఈ మూడు సినిమాలు కూడా డిఫరెంట్ జోనర్స్ నుంచి వచ్చాయి. మూడు కూడా అని తరగతుల ప్రేక్షకులను అలరించాయి. ఈ ఏడాది ఆరంభంలోనే మలయాళ ఇండస్ట్రీ గురించి అంతా మాట్లాడుకునేలా చేశాయి.
విశేషం ఏమిటంటే ఈ మూడు సినిమాలు చాలా తక్కువ బడ్జెట్ లో రూపొందినవే. ‘భ్రమ యుగం’ .. ‘ప్రేమలు’ సినిమాలు 100 కోట్ల వసూళ్లను దాటితే, ‘మంజుమ్మల్ బాయ్స్’ 200 కోట్ల మార్కును దాటేసింది. ఆ సక్సెస్ లను ఇండస్ట్రీ మరిచిపోకముందే ఇప్పుడు మరో ఇండస్ట్రీ హిట్ పడింది. ఆ సినిమా పేరే ‘ఆవేశం’. ఫహాద్ ఫాజిల్ కథానాయకుడిగా నటించిన ఈ సినిమా, ఏప్రిల్ 11వ తేదీన విడుదలైంది. తొలి రోజునే హిట్ టాక్ తెచ్చుకుని దూసుకుపోయింది.
జితూ మాధవన్ దర్శకత్వం వహించిన ఈ సినిమా, చాలా వేగంగా 150 కోట్ల క్లబ్ లోకి చేరిపోయింది. అలాంటి ఈ సినిమా ఇప్పుడు ఓటీటీ ఫ్లాట్ ఫామ్ పైకి వచ్చేసింది. ఈ సినిమా స్ట్రీమింగ్ హక్కులను అమెజాన్ ప్రైమ్ వారు దక్కించుకున్నారు. ఈ రోజు నుంచే ఈ సినిమాను అందుబాటులోకి తెచ్చారు. త్వరలోనే మిగతా భాషలలోను ఈ సినిమా అందుబాటులోకి రానుంది. ఓటీటీ వైపు నుంచి ఈ సినిమా ఏ స్థాయి రెస్పాన్స్ ను తెచ్చుకుంటుందనేది చూడాలి.
