మహేశ్ బాబు హీరోగా త్రివిక్రమ్ దర్శకత్వంలో ‘గుంటూరు కారం‘ సినిమా రూపొందుతోంది. రాధాకృష్ణ నిర్మిస్తున్న ఈ సినిమాను పాన్ ఇండియా స్థాయిలో రిలీజ్ చేయనున్నారు. చాలా గ్యాప్ తరువాత మహేశ్ బాబు పూర్తి స్థాయి మాస్ రోల్ చేస్తున్న సినిమా ఇది. మహేశ్ ను డిఫరెంట్ లుక్ తో త్రివిక్రమ్ చూపించనున్నాడు. ఈ సినిమా నుంచి వదులుతున్న అప్ డేట్స్ అంచనాలు పెంచుతూ వెళుతున్నాయి. ఈ సినిమా బ్లాక్ బస్టర్ హిట్ కొట్టాలనే ఆలోచనతో ఆయన అభిమానులు ఉన్నారు.
‘భరత్ అనే నేను’ సినిమా నుంచి మహేశ్ బాబు వరుస విజయాలతో దూసుకుపోతున్నాడు. ‘మహర్షి’ .. ‘సరిలేరు నీకెవ్వరూ’తో హ్యాట్రిక్ హిట్ ను తన ఖాతాలో వేసుకున్నాడు. ఆ తరువాత మహేశ్ చేసిన ‘సర్కారువారి పాట’ కూడా సక్సెస్ అయింది. అయితే అది మహేశ్ రేంజ్ హిట్ కాదనే టాక్ వినిపించింది. ఆ సినిమా విషయంలో అభిమానులు ఆశించిన స్థాయి సంతృప్తిని పొందలేకపోయారనే కామెంట్ ఉంది. ఈ నేపథ్యంలోనే ‘గుంటూరు కారం’ సినిమా సంక్రాంతికి రెడీ అవుతోంది.
త్రివిక్రమ్ – మహేశ్ బాబు కాంబినేషన్లో వస్తున్న మూడో సినిమా ఇది. చాలా గ్యాప్ తరువాత ఈ కాంబినేషన్లో రూపొందుతున్న సినిమా కావడంతో అభిమానుల్లో చాలా ఆసక్తి ఉంది. త్రివిక్రమ్ – మహేశ్ కాంబోలో వచ్చిన ‘అతడు’ సినిమాను ప్రేక్షకులు ఇప్పటికీ మరిచిపోలేదు. ఆ స్థాయి హిట్ పడాలనే ఆశతో మహేశ్ ఫ్యాన్స్ ఉన్నారు. వసూళ్ల పరంగా కొత్త రికార్డులను సృష్టించాలని కోరుకుంటున్నారు. ఈ సినిమా తరువాత మహేశ్ చేసేది రాజమౌళి ప్రాజెక్టు కావడం వలన, మరో హ్యాట్రిక్ హిట్ పడటం ఖాయమనే నమ్మకంతో ఉన్నారు. అందువలన ‘గుంటూరు కారం’ సంచలన విజయాన్ని సాధించాలని ఆశిస్తున్నారు.
