సుద్దాల అశోక్ తేజ సినిమా పాటల రచయిత కాబట్టి పరిచయం అక్కర్లేదు .
“చెట్టునురా -చెలిమినిరా
తరువునురా – తల్లినిరా
నరికివేయబోకురా
కరువు కోరుకోకురా
అమ్మనురా అమ్మకురా
కొడుకువురా కొట్టకురా…”
అని ఆయనొక పర్యావరణ ప్రబోధ గీతం రాశారు. చెట్టు పాడే ఈ పాట సినిమా పాట కాదు . సినిమాల్లో వాడలేదు .అయినా, సినిమా ఇంత వాస్తవికతను, సందేశాన్ని సహించదు. సహించాలని కోరుకోకూడదు. దాని మర్యాదలు దానివి.
“కొట్టు కొట్టు చెట్టే కొట్టు-
చెట్టు చెట్టు పట్టే కొట్టు” లాంటి ప్రాసల పాకులాటలకే సినిమా ఊగిపోతుంది. దాని బలం, బలహీనత అది. ఆ చర్చ మనకనవసరం.
ఇది సుద్దాల ప్రైవేట్ సాంగ్. అక్కడక్కడా ప్రకృతి ప్రేమికులయిన భాషా ప్రేమికుల నోళ్ళలో మాత్రమే నానుతున్న పాట. ఇంకా బాగా ప్రచారం కావాల్సిన పాట.
Youtube : https://www.youtube.com/@dhatritvtelugu
Facebook : https://www.facebook.com/dhatritelugutv
Instagram: https://www.instagram.com/dhatritelugutv/
Twitter :https://x.com/Dhatri_Tv
సరళమయినభాషలో అందరికీ అర్థమయ్యేలా రాశారు కాబట్టి నిజానికి విశ్లేషణ అనవసరం.
“చెట్టును, చెలిమిని, తల్లిని. మీరు నా పిల్లలు. నన్ను కొట్టకండి. కొట్టి కట్టెలుగా అమ్మకండి. నేలతల్లి గుండెలో నుండి విత్తనం గొంతుకతో ప్రకృతి సుప్రభాతగీతం పాడుతూ పసిపెదవులతో నేను మోసులెత్తుతాను. కొమ్మలు రెమ్మలు ఊపుతూ నేను పాడే పచ్చనాకు సంగీతం మీకు నచ్చలేదా? రాళ్లతో నన్ను కొట్టినా నా పిల్లలే కదా అనుకుని పళ్ళను ఇస్తున్నాను. పనికి రాని గాలి పీల్చి మీకేమో ప్రాణవాయువునిస్తున్నాను. కాలుష్యాన్ని తగ్గిస్తూ మా పుట్టుకను మీకోసమే త్యాగం చేశాను. ఎండవేడిని తిని, పత్రహరితాన్ని తయారు చేసుకుని, వేరునీరు తాగి మీకు ఫలాలను ఇస్తున్నాను. నేనేమో మీ కడుపు నింపితే…మీరేమో నా కడుపు కోస్తారు. చనిపోయిన వారి చితికోసం బతికి ఉన్న మమ్మల్ను చంపే నాగరికత మీది. మీచావు మా చావుకొచ్చినా భరించే త్యాగం మాది. ఒకవేళ మా శరీరాలను తుంచాలనుకుంటే కనీసం వేళ్లనయినా అలా వదిలేయండి. మళ్ళీ మీకోసమే చిగురిస్తాం. ఒక చెట్టును కొట్టాలంటే ముందు పది చెట్లను పెంచండి”- అన్నది ఆ పాట భావం.
రుద్రంలో వృక్షేభ్యో – హరికేశేభ్యో అని స్పష్టంగా ఒక మాట ఉంది. చెట్టు, చెట్టు కొమ్మల్లో ఆకుల పత్రహరితం – అంతా శివమయం. ఒక్కో చెట్టు ఒక్కో దేవుడికి స్థానం. ఒకే చెట్టులో శివ కేశవులు ఇద్దరూ కొలువయినవి ఉన్నాయి.
చెట్టు లేక పొతే తిండి లేదు, గాలి లేనే లేదు .
మనకేమో చెట్టూ పుట్ట లేకుండా ఫ్రెష్ కూరలు, పళ్లు, ఆకులు, ఫ్రెష్ గాలి కావాలి.
ఎలా వస్తాయో? ఎక్కడినుండి వస్తాయో?
నరికేసిన చెట్టుపాడే ఈ పాటను అడగండి – సమాధానం ఇస్తుందేమో ?
“చెట్టునై పుట్టి ఉంటే ఏడాదికొక్క వసంతమయినా మిగిలేది- మనిషినై పుట్టి అన్ని వసంతాలు కోల్పోయాను” అన్నాడు గుంటూరు శేషేంద్ర. రాముడు వనవాసానికి వెళుతుంటే అయోధ్యవాసులందరూ సరయూ నది దాకా వెళ్లి వీడ్కోలు ఇచ్చి వచ్చారు. వేళ్ళున్నందుకు కదల్లేక చెట్ల కొమ్మలచేతులు రాముడు వెళ్ళినవైపు తిప్పి విలపించాయన్నాడు వాల్మీకి.
చెట్టంత ఎదిగిన మనిషి యుగయుగాలుగా చెట్టును పూజిస్తూ వచ్చాడు. చెట్టును నమ్ముకునే బతికాడు. ఇప్పుడు చెట్టును అమ్ముకుని బతుకుతున్నాడు. చెట్లు మాయమయ్యేసరికి కోల్పోయిన వసంతాలెన్నో తెలిసి వస్తోంది. చుట్టూ చెట్టంటూ చుట్టమై ఉంటే శేషేంద్ర చెప్పినట్లు ఏడాదికొక్క వసంతమైనా వస్తుందని, కాలం కలిసొస్తే ఏడాదంతా వసంతమొస్తుందని కొందరైనా పూనుకుని చెట్లను పరిరక్షిస్తున్నారు.
ఆదిలాబాద్ జిల్లా ఇచ్చోడ మండలం ముఖరా గ్రామం ఆరేళ్లక్రితం పంచాయతీగా మారింది. గాడ్గే మీనాక్షి గ్రామ తొలి సర్పంచ్ గా ఏకగ్రీవంగా ఎన్నికయ్యారు. ఎంతో కొంత ఊరిని బాగుచేయాలన్న పట్టుదలతో మీనాక్షి కార్యరంగంలోకి దిగారు. ఆమె చొరవతో బహిరంగ మల విసర్జనకు తెరపడింది. చెత్త నుండి వర్మీ కంపోస్ట్ చేస్తే అయిదు లక్షల ఆదాయం వచ్చింది. దాంతో గ్రామంలో వీధి దీపాలు, ప్రభుత్వ కార్యాలయాలకు సోలార్ వెలుగులు ఏర్పాటు చేశారు. కరెంటు బిల్లులు దాదాపు సున్నా అయ్యాయి. ఐదేళ్లలో లక్షకు పైగా మొక్కలు నాటారు. చెట్ల సంరక్షణ, వాటిని పర్యవేక్షించడానికి మీనాక్షి వినూత్నంగా ఆలోచించారు. చెట్లకు జియో ట్యాగింగ్ ఏర్పాటు చేశారు. మనిషికి ఆధార్ నంబర్ ఉన్నట్లు ప్రతి చెట్టుకు డిజిటల్ ఆధార్ క్యూ ఆర్ కోడ్ ఏర్పాటు చేసి చెట్టు కొమ్మకు బిగించారు. మనం ఆ కోడ్ స్కాన్ చేయగానే అది ఏ చెట్టు? దాని శాస్త్రీయ నామం ఏమిటి? ఎప్పుడు నాటారు? ఒక్కో చెట్టు ఎంత కార్బన్ డై అక్సయిడ్ ను తీసుకుని ఎంత ప్రాణవాయువు ఆక్సిజన్ ను విడుదల చేస్తుంది? లాంటి సమస్త వివరాలు వస్తాయి. నాటిన చెట్టు ఎండిపోతే…అదే స్థానంలో మరో చెట్టును నాటుతున్నారు. దేశంలో చెట్లకు ప్రత్యేక గుర్తింపు నంబరు వేసిన తొలి గ్రామమై ముఖరా ముఖం పచ్చనాకు సాక్షిగా పచ్చగా కళకళలాడుతోంది.
మీనాక్షి పదవీకాలం అయిపోయింది. ప్రస్తుతం ఆమె మాజీ. కానీ ప్రతి చెట్టుకూ ఆమె చుట్టమే. ఆ చెట్ల ఎదుగుదల పనులనుండీ ఆమెను ఎవ్వరూ మాజీ చేయలేరు.
“ఎవరో ఒకరు
ఎపుడో అపుడు
నడవరా ముందుకు!”
Youtube : https://www.youtube.com/@dhatritvtelugu
Facebook : https://www.facebook.com/dhatritelugutv
Instagram: https://www.instagram.com/dhatritelugutv/
Twitter :https://x.com/Dhatri_Tv
ఒకానొక పల్లెలో ఒకానొక సర్పంచ్ తలచుకుంటే ఇన్నిన్ని మంచి పనులు చేయగలిగారు. లక్ష చెట్లు కొమ్మల రెమ్మల చేతులు చాచి కొత్తపూల మధుమాసాలను పల్లెకు తీసుకొచ్చేలా చేయగలిగారు. ప్రతి ఊళ్ళో ఒక మీనాక్షి ఉంటే! ప్రతి ఊరు ఒక ముఖరా అయితే! పీల్చుకున్నవారికి పీల్చుకున్నంత ప్రాణవాయువు.
-పమిడికాల్వ మధుసూదన్
9989090018
YouTube – ధాత్రి మహతి
Twitter – ఐధాత్రి2
Facebook – ఐధాత్రి తెలుగు
Instagram – ఐధాత్రి తెలుగు
