గోపీచంద్, శ్రీవాస్ కాంబినేషన్ లో ‘లక్ష్యం’, ‘లౌక్యం’ వంటి సూపర్ హిట్ల తర్వాత వస్తున్న హ్యాట్రిక్ ఫిల్మ్ ‘రామబాణం’. వరుస సంచలన విజయాలతో దూసుకుపోతున్న పీపుల్ మీడియా ఫ్యాక్టరీ బ్యానర్‌ లో ఈ చిత్రం రూపొందుతోంది. టీజీ విశ్వప్రసాద్, వివేక్ కూచిభొట్ల సంయుక్తంగా ఈ చిత్రాన్ని నిర్మిస్తున్నారు. ఇందులో గోపీచంద్ సరసన నాయికగా డింపుల్ హయతి నటిస్తుండగా, జగపతిబాబు, కుష్బూ ప్రధాన పాత్రల్లో నటిస్తున్నారు.
‘రామబాణం’లో విక్కీ అనే పవర్ ఫుల్ పాత్రలో గోపీచంద్ కనిపించనున్నారు. మహా శివరాత్రి కానుకగా ఫస్ట్ లుక్ ని విడుదల చేశారు. ‘విక్కీస్ ఫస్ట్ యారో’ పేరుతో విడుదల చేసిన ప్రత్యేక వీడియో విశేషంగా ఆకట్టుకుంటోంది. కథానాయకుడిది రామబాణంలా దూసుకుపోయే స్వభావమని తెలిపేలా చేతికి బాణం లాకెట్ ధరించి అదిరిపోయే ఫైట్ తో గోపీచంద్ ఎంట్రీ ఇచ్చారు. ఆయనకు సరైన యాక్షన్ సినిమా పడితే.. ఏ రేంజ్ లో చెలరేగిపోతారో కేవలం కొన్ని సెకన్ల వీడియోతోనే చూపించారు దర్శకుడు శ్రీవాస్. అలా అని ఇది పూర్తి యాక్షన్ ఫిల్మ్ కాదు.. తమ గత చిత్రాల తరహాలో ఎంటర్టైన్మెంట్ కూడా ఉంటుందని తెలిపేలా కొసమెరుపుతో ముగించారు. చిన్నోడా అనే వాయిస్ రాగానే కథానాయకుడు సౌమ్యంగా అమృత నిలయంలోకి ప్రవేశించడం ఆకట్టుకుంది. వీడియోలో కథానాయకుడి పాత్రలో చూపించిన వ్యత్యాసానికి తగ్గట్లుగా మిక్కీ జే మేయర్ అందించిన నేపథ్య సంగీతం మెప్పించింది.
ఈ వీడియోలో గోపీచంద్ మేకోవర్, స్క్రీన్ ప్రజెన్స్ ప్రత్యేక ఆకర్షణగా నిలిచాయి. గత చిత్రాలకు భిన్నంగా ఈ సినిమాలో సరికొత్త గోపీచంద్ ని చూడబోతున్నామని అర్థమవుతోంది. అలాగే వీడియోలో ప్రతి ఫ్రేమ్ లో భారీతనం కనిపిస్తోంది. ప్రేక్షకులలో గోపీచంద్ – శ్రీవాస్ కాంబినేషన్ పై ఉన్న క్రేజ్ ని దృష్టిలో ఉంచుకొని ఖర్చు విషయంలో ఏమాత్రం ఆలోచించకుండా నిర్మాతలు భారీగా ఖర్చు చేసినట్లు స్పష్టంగా తెలుస్తోంది. మొత్తానికి ఈ ‘విక్కీస్ ఫస్ట్ యారో’ వీడియో సినిమా పై మేకర్స్ కి ఉన్న నమ్మకాన్ని తెలియజేయడమే కాకుండా.. ప్రేక్షకుల్లో అంచనాలను రెట్టింపు చేసేలా ఉంది. ఈ చిత్రాన్ని 2023 వేసవి కానుకగా విడుదల చేయడానికి నిర్మాతలు సన్నాహాలు చేస్తున్నారు.
