ఇన్‌ఫోసిస్ స‌హ వ్య‌వ‌స్థాప‌కుడు నంద‌న్ నిలేక‌ని .. ఐఐటీ బాంబేకు చెందిన పూర్వ విద్యార్థుల గ్రూపున‌కు 315 కోట్లు విరాళం ఇచ్చారు. ఐఐటీ బాంబే 50 ఏళ్ల వేడుక‌ల్ని నిర్వ‌హిస్తున్న సంద‌ర్భంగా ఆయ‌న ఈ విరాళం ప్ర‌క‌టించారు. 1973లో ఐఐటీ బాంబేలో ఆయ‌న ఎల‌క్ట్రిక‌ల్ ఇంజినీరింగ్‌లో డిగ్రీ చేశారు. త‌న విరాళంతో ఆ విద్యా సంస్థ‌లో ప్ర‌పంచ స్థాయి మౌళిక స‌దుపాయాలు క‌ల్పించ‌నున్న‌ట్లు చెప్పారు. ఇంజినీరింగ్‌, టెక్నాల‌జీ రంగాల్లో ప‌రిశోధ‌న‌లు పెంచ‌నున్న‌ట్లు చెప్పారు. టెక్నాల‌జీ స్టార్ట‌ప్ ఎకోసిస్ట‌మ్‌ను డెవ‌ల‌ప్ చేయ‌నున్న‌ట్లు ఓ ప్ర‌క‌ట‌లో వెల్ల‌డించారు.
ఐఐటీ బాంబే త‌న జీవితంలో ఓ కీల‌క‌మైంద‌ని, త‌న భ‌విష్య‌త్తును తీర్చిదిద్దింద‌ని, నా భ‌విష్య‌త్తుకు ఫౌండేష‌న్ వేసింద‌ని, ఆ ప్ర‌ఖ్యాత విద్యా సంస్థ‌తో 50 ఏళ్ల అనుబంధం ఏర్ప‌డింద‌ని, ఆ సంస్థ భ‌విష్య‌త్తుకు తోచిన రీతిలో స‌హాయం చేయ‌ద‌లుచుకున్నాన‌ని నంద‌న్ నిలేక‌ని త‌న రిలీజ్‌లో తెలిపారు. గ‌తంలోనూ ఐఐటీ బాంబేకు నిలేక‌ని 85 కోట్లు డోనేట్ చేశారు. దీంతో ఆయ‌న మొత్తం కాంట్రిబ్యూష‌న్ 400 కోట్ల‌కు చేరింది.
