Rudram Kota:
సీనియర్ నటి జయలలిత మొట్టమొదటిసారి ఎ ఆర్ కె విజువల్స్ బ్యానర్ పై సమర్పిస్తున్న చిత్రం ‘రుద్రం కోట’. ఈ నూతన చిత్ర టైటిల్ ను డైలాగ్ కింగ్ మోహన్ బాబు చేతుల మీదుగా విడుదల చేయించారు చిత్ర యూనిట్. ఈ కార్యక్రమానికి హాజరైన మంచు మోహన్ బాబు టైటిల్ ను విడుదల చేసి టీమ్ కు అభినందనలు తెలియచేశారు. ఈ సంద‌ర్భంగా మోహన్ బాబు మాట్లాడుతూ “చాలా రోజులయ్యింది ఆడియో ఫంక్షన్ లకు హాజరయ్యి… జయలలిత చాలా మంచి అమ్మాయి. నాకు ‘రౌడీ గారి పెళ్ళాం’ చిత్రం నుంచీ ప‌రిచ‌యం. అప్పటి నుంచి తనంటే నాకు చాలా గౌరవం, ప్రేమ, అభిమానం. తను ఈ రోజు మొదటి సారిగా ఒక చిత్రాన్ని సమ‌ర్పిస్తోంద‌ని తెలిసి నా వంతు సపోర్ట్ ను అందించాలని పిలవగానే వచ్చాను.
‘ఎవరైనా చిన్న సినిమాతోనే మొదలుపెట్టి ఎంతో పెద్ద స్థాయి వరకు వెళ్తారు. నిర్మాతగా నేను కూడా చిన్న సినిమాతోనే మొదలు పెట్టాను. ఇప్పుడు ఆ సాయిబాబా ఆశీస్సులతో మీ అందరి ప్రోత్సాహంతో ఈ స్థాయిలో ఉన్నాను. ఈ సినిమాలో అందరూ కొత్త వారే అని తెలిసింది. ఏం పరవాలేదు ఇప్పుడు కొత్తే కానీ తరువాత పాతదే. ఈ చిత్ర నిర్మాత అనిల్ చాలా మంచి స్థాయికి వెళ్లాలని, అలానే దర్శకుడు కోన రాము పెద్ద డైరెక్టర్ అయ్యి నాకు కూడా తన సినిమాలో అవకాశం ఇవ్వాలని, అలానే ఆ సాయినాథుని ఆశీస్సులు మీకు మీ చిత్రానికి ఉండాలని కోరుకుంటున్నాను. మేము తిరుపతిలో ఆ తిరుమలేషుని దర్శించడానికి వచ్చిన ప్రతి ఒక్కరూ తిరుపతిలోని సాయి బాబా దేవాలయానికి కూడా వచ్చి వెళ్లేంత పెద్ద దేవాలయాన్ని నిర్మించనున్నాం” అని తెలియచేశారు.
జయలలిత మాట్లాడుతూ ‘రుద్రం కోట’ చాలా మంచి కథ. అందుకే మొదటిసారి అటెంప్ట్ చేస్తున్నాను. హీరో అనిల్ రుద్రంగా, నేను కోటమ్మగా నటిస్తున్నాం. ఈ ఊరు ఖమ్మం డిస్ట్రిక్ట్ లో పోలవరం చుట్టుపక్కల ఉండేది. ఇప్పుడది పోలవరం ప్రాజెక్ట్ లో పోయింది. అక్కడే షూటింగ్ జరుపుకున్నాం. ఇందులో నటించిన ప్రతి పాత్రకీ ప్రాధాన్యత ఉంది. ఇందులో 5 పాటలుంటాయి అన్నారు. ఇంకా ఈ కార్యక్రమంలో హీరో నిర్మాత అనిల్ కొండవల్లి, దర్శకుడు కోన రాము, హీరోయిన్ విభీష, రైటర్ వెంకట్ బాబు తదితరులు పాల్గొన్నారు.
Also Read : ఆకట్టుకుంటోన్న ఆనంద్ దేవ‌ర‌కొండ `హైవే` కాన్సెప్ట్ పోస్ట‌ర్స్‌
