ప్రభాస్ తాజా చిత్రంగా ప్రేక్షకుల ముందుకు రావడానికి ‘సలార్‘ రెడీ అవుతోంది. భారీ బడ్జెట్ తో రూపొందుతున్న ఈ సినిమా, రెండు భాగాలుగా విడుదల కానుంది. ప్రశాంత్ నీల్ దర్శకత్వం వహిస్తున్న ఈ సినిమా, బొగ్గుగనుల నేపథ్యంలో నడవనుంది. మాస్ యాక్షన్ జోనర్లో ఈ సినిమా పలకరించనుంది. శ్రుతి హాసన్ కథానాయికగా నటిస్తున్న ఈ సినిమాకి, భారీ తారాగణం ప్రత్యేకమైన ఆకర్షణగా నిలవనుంది. డిసెంబర్ 22వ తేదీన పాన్ ఇండియా స్థాయిలో ఈ సినిమాను రిలీజ్ చేయనున్నారు.
ప్రస్తుతం ఈ సినిమా కోసం ఒక స్పెషల్ సాంగును చిత్రీకరిస్తున్నట్టుగా తెలుస్తోంది. బాలీవుడ్ బ్యూటీ సిమ్రత్ కౌర్ బృందంపై ఈ పాటను షూట్ చేస్తున్నారని అంటున్నారు. హైదరాబాదు – రామోజీ ఫిల్మ్ సిటీలో షూటింగు జరుగుతోందని చెబుతున్నారు. తెలుగులో ‘డర్టీ హరి’ .. ‘ బంగార్రాజు’ వంటి సినిమాల్లో సిమ్రత్ కౌర్ మెరిసింది. ఇటీవల ఆమె చేసిన ‘గదర్ 2’ మంచి క్రేజ్ ను తీసుకొచ్చింది. ఈ నేపథ్యంలోనే ‘సలార్’ సినిమాలోకి స్పెషల్ సాంగ్ కోసం ఆమె ఎంపిక జరిగినట్టుగా చెబుతున్నారు. ఈ సాంగ్ మాస్ ఆడియన్స్ ను ఒక ఊపు ఊపేస్తుందని అంటున్నారు.
ఇక ‘సలార్’ సినిమా రిలీజ్ డేట్ దగ్గర పడుతున్న కారణంగా, ప్రమోషన్స్ జోరును పెంచడానికి సన్నాహాలు చేసుకుంటున్నారు. హైదరాబాద్ .. బెంగుళూరు .. ఢిల్లీ … ముంబై నగరాల్లో భారీస్థాయిలో ఈవెంట్స్ ను ప్లాన్ చేస్తున్నట్టుగా తెలుస్తోంది. రవి బస్రూర్ బ్యాక్ గ్రౌండ్ స్కోర్ ఈ సినిమా హైలైట్స్ లో ఒకటిగా నిలిస్తుందనే టాక్ బలంగా వినిపిస్తోంది. జగపతిబాబు .. పృథ్వీరాజ్ సుకుమారన్ .. ‘గరుడ’ రామచంద్రరాజు కీలకమైన పాత్రలలో కనిపించనున్నారు. ప్రభాస్ అభిమానులంతా కూడా ఇప్పుడు ఈ సినిమా కోసమే వేయికళ్లతో వెయిట్ చేస్తున్నారు.
