మెగాస్టార్ చిరంజీవి లూసిఫర్ రీమేక్ లో నటించనున్న విషయం తెలిసిందే. ఈ చిత్రానికి మోహన్ రాజా దర్శకుడు. ఆమధ్య ఈ సినిమాని పూజా కార్యక్రమాలతో ప్రారంభించడం జరిగింది. ఆచార్య సినిమా పూర్తైన తర్వాత సెట్స్ పైకి వెళుతుంది అనుకుంటుంటే.. ఇటీవల కాలంలో లూసిఫర్ గురించి చాలా వార్తలు వచ్చాయి. ముఖ్యంగా దర్శకుడు మోహన్ రాజా కథలో చేసిన మార్పులు – చేర్పులు చిరంజీవికి నచ్చలేదని.. అందుచేత మోహన్ రాజా ఈ ప్రాజెక్ట్ నుంచి తప్పుకున్నాడని ప్రచారం జరిగింది. అంతే కాకుండా.. ఈ ప్రాజెక్ట్ ను క్యాన్సిల్ చేసారనే టాక్ కూడా వచ్చింది.
అయితే.. ప్రచారంలో ఉన్న ఈ వార్తల్లో వాస్తవం లేదని.. లూసిఫర్ దర్శకుడు మోహన్ రాజే.. అందులో ఎలాంటి మార్పులేదని క్లారిటీ వచ్చేసింది. విషయం ఏంటంటే.. ఈ రోజు దర్శకుడు మోహన్ రాజా పుట్టిన రోజు. ఈ సందర్భంగా కొణిదెల ప్రొడక్షన్, మెగా సూపర్ గుడ్ ఫిలిమ్స్ సంస్థలు తమ దర్శకుడికి బర్త్ డే విషెస్ తెలిపాయి. అంతే కాకుండా.. మా #చిరు153 దర్శకుడికి పుట్టిన రోజు శుభాకాంక్షలు అని తెలియచేస్తూ పోస్టర్స్ ని కూడా సోషల్ మీడియాలో రిలీజ్ చేశాయి. ఈవిధంగా ప్రచారంలో ఉన్న వార్తల్లో వాస్తవం లేదని.. లూసిఫర్ రీమేక్ దర్శకుడు మోహన్ రాజే అని క్లారిటీ ఇచ్చారు.
