Pro Kabaddi: వివో ప్రో కబడ్డీ లీగ్ లో నేడు ఒక అద్భుత విజయం నమోదైంది. దబాంగ్ ఢిల్లీ పై బెంగుళూరు బుల్స్ 39 పాయింట్ల తేడాతో భారీ విజయం నమోదు చేసింది. బెంగుళూరు కెప్టెన్ పవన్ షెరావత్ 27 (22 టచ్; 5 బోనస్) పాయింట్లు సాధించి ఈ సీజన్ లో తిరుగులేని ఆటగాడిగా మరోసారి నిరూపించుకున్నాడు. హర్యానా – యూపీ మ్యాచ్ టై గా ముగిసింది.
హర్యానా స్టీలర్స్ – యూపీ యోధ జట్ల మధ్య జరిగిన తొలి మ్యాచ్ 36-36తో డ్రా గా ముగిసింది. తొలి అర్ధ భాగంలో యూపీ 14-13 తో స్వల్ప ఆధిక్యం సంపాదించింది. రెండో అర్ధభాగంలో హర్యానా 23-22 తో ఒక పాయింట్ ఆధిక్యం కనబర్చింది. దీనితో మ్యాచ్ టై అయ్యింది. హర్యానా కెప్టెన్ వికాస్ కందోలా 17 పాయింట్లు సాధించి రాణించాడు.
బెంగుళూరు బుల్స్ – దబాంగ్ ఢిల్లీ జట్ల మధ్య జరిగిన రెండో మ్యాచ్ ఏకపక్షంగా సాగింది. బెంగుళూరు 61-22 తో 39 పాయింట్ల అతి భారీ తేడాతో విజయం సాధించింది. తొలి అర్ధ భాగంలో 27-11 తో 16 పాయింట్ల ఆధిక్యం సంపాదించిన బెంగుళూరు బుల్స్ రెండో అర్ధభాగంలోనూ అదే జోరు కొనసాగించి 34-11తో 23 పాయింట్ల ఆధిక్యం సంపాదించారు. ఈ సీజన్ లో అతిపెద్ద విజయాన్ని నమోదు చేసుకున్నారు.
నేటి మ్యాచ్ లు పూర్తయిన తరువాత పాట్నా పైరేట్స్ (34 పాయింట్లు); బెంగుళూరు బుల్స్ (33); దబాంగ్ ఢిల్లీ (32); తమిళ్ తలైవాస్ (27); యూ ముంబా(25); యూపీ యోధ (23) జట్లు టాప్ సిక్స్ లో ఉన్నాయి.
