England in Semis race: ఐసిసి మహిళా వరల్డ్ కప్ లో భాగంగా నేటి మ్యాచ్ లో పాకిస్తాన్ పై ఇంగ్లాండ్ 9 వికెట్లతో ఘనవిజయం సాధించి సెమీస్ రేసులో నిలిచింది. బ్రంట్, ఎక్సెల్ స్టోన్ బౌలింగ్ లో రాణించగా, డానియెల్ వ్యాట్ బ్యాటింగ్ లో సత్తా చాటింది.
క్రైస్ట్ చర్చ్ లోని హేగ్లీ ఓవల్ మైదానంలో జరిగిన ఈ మ్యాచ్ లో ఇంగ్లాండ్ టాస్ గెలిచి బౌలింగ్ ఎంచుకుంది. పరుగుల ఖాతా తెరవక ముందే పాక్ వికెట్ల పతనం (నహిదా ఖాన్- డకౌట్) మొదలైంది. ఆ కాసేపటికే మరూఫ్ (9) కూడా రనౌట్ అయ్యింది. జట్టులో ఓపెనర్ అమీన్-32; సిద్రా నవాజ్-23; ఒమైనా సోహైల్-11 మాత్రమే రెండంకెల స్కోరు చేయగలిగారు. 41.3 ఓవర్లలో 105 పరుగులకే పాక్ ఆలౌట్ అయ్యింది. ఇంగ్లాండ్ బౌలర్లలో బ్రంట్, ఎక్సెల్ స్టోన్ చెరో మూడు; కాటే క్రాస్, హెదర్ నైట్ చెరో వికెట్ పడగొట్టారు.
స్వల్ప లక్ష్యంతో బరిలోకి దిగిన ఇంగ్లాండ్ 20 పరుగుల వద్ద తొలి వికెట్ (టామీ బ్యూమోంట్-2) కోల్పోయింది. ఆ తర్వాత డేనియల్ వ్యాట్-76 (68 బంతులు, 11 ఫోర్లు); హెదర్ నైట్-24 పరుగులతో అజేయంగా నిలిచి 19.2 ఓవర్లలోనే జట్టుకు అద్భుత విజయం అందించారు. పాక్ బౌలర్ డయానా బేగ్ ఒక వికెట్ దక్కించుకుంది.
డేనియల్ వ్యాట్ కే ‘ప్లేయర్ అఫ్ ద మ్యాచ్’ దక్కింది.
ఈ విజయంతో ఇండియాను వెనక్కి నెట్టి ఇంగ్లాండ్ నాలుగో స్థానానికి చేరుకుంది.
Also Read : మహిళల వరల్డ్ కప్: సెమీస్ కు సౌతాఫ్రికా
