ఒకే స్టేజ్ పై సంద‌డి చేయ‌నున్న బాల‌య్య‌, ఎన్టీఆర్?

నంద‌మూరి న‌ట‌సింహం బాల‌కృష్ణ‌, యంగ్ టైగ‌ర్ ఎన్టీఆర్.. ఈ బాబాయ్ – అబ్బాయ్ క‌లిసి సినిమా చేయాల‌ని అభిమానులు ఎప్ప‌టి నుంచో కోరుకుంటున్నారు. ఇప్ప‌టి వ‌ర‌కు కుద‌ర‌లేదు. క‌నీసం ఇద్ద‌రూ క‌లిసి ఒకే స్టేజ్ పైకి వ‌చ్చినా చూడాల‌నేది అభిమానుల ఆశ‌. అయితే… చాలా అరుదుగా బాల‌య్య‌, ఎన్టీఆర్ ఓకే వేదిక పైకి వ‌స్తుంటారు. ఇప్పుడు మ‌రోసారి బాల‌య్య‌, ఎన్టీఆర్ ఒకే వేదిక పైకి రానున్నార‌ని వార్త‌లు వ‌స్తున్నాయి.

నంద‌మూరి కళ్యాణ్‌ రామ్ హీరోగా న‌టిస్తూ.. నిర్మించిన భారీ సోషియో ఫాంటసీ చిత్రం బింబిసార. ఈ సినిమా ద్వారా వ‌శిష్ట్ ద‌ర్శ‌కుడిగా ప‌రిచ‌యం అవుతున్నారు. ఈ చిత్రంలో కేథరిన్ థ్రెసా, సంయుక్త మీనన్ హీరోయిన్స్ గా నటించారు. ఇటీవ‌ల రిలీజ్ చేసిన బింబిసార ట్రైల‌ర్ కు ట్రెమండ‌స్ రెస్పాన్స్ వ‌చ్చింది. ఈ భారీ చిత్రాన్ని ఆగస్ట్ 5న విడుదల చేయ‌డానికి ప్లాన్ చేస్తున్నారు.

ఈ చిత్రానికి సంబంధించిన ప్రీరిలీజ్ ఈవెంట్ ను ఘనంగా నిర్వహించబోతున్నారు. ఈ ఈవెంట్ కు బాబాబ‌య్ బాల‌కృష్ణ‌, అబ్బాయ్ ఎన్టీఆర్ హాజరుకాబోతున్నార‌ని స‌మాచారం. అయితే.. దీనికి సంబంధించి అధికారికంగా ప్రకటన వెలువడాల్సి ఉంది. త్వ‌ర‌లోనే బింబిసార ప్రీ రిలీజ్ ఈవెంట్ ఎక్క‌డ..? ఎప్పుడు..?  గెస్ట్ లు ఎవ‌రు..? అనేది ప్ర‌క‌టిస్తార‌ట‌. ఒకవేళ నిజంగా బాల‌య్య‌, ఎన్టీఆర్ ఈ వేడుక‌కు హాజ‌రైతే.. నందమూరి అభిమానులకు పండగే.