జీవో నంబర్ 45ను సవాల్ చేస్తూ దాఖలైన పిటిషన్ ను ఆంధ్ర ప్రదేశ్ హైకోర్టు కొట్టి వేసింది. రాజధాని ప్రాంతంలో వేలాది మంది పేద‌ల‌కు ఇళ్ల స్థలాలు ఇవ్వాల‌న్న జగన్ ప్ర‌భుత్వానికి హైకోర్టులో భారీ ఊర‌ట ల‌భించింది. రాజధాని ఏ ఒక్క వ‌ర్గానికో చెందింది కాద‌ని, అంద‌రిదీ అని , అభిప్రాయపడింది. పేద‌ల‌కు ఇంటి స్థలాలు ఇచ్చేందుకు హైకోర్టు చీఫ్ జ‌స్టిస్ నేతృత్వంలోని ధర్మాసనం గ్రీన్ సిగ్నల్ ఇచ్చింది. అయితే ఇళ్ళ పట్టాల పంపిణీ గతంలో సిఆర్దీఏ పై హైకోర్టు ఇచ్చిన తీర్పుకు లోబడి ఉండాలని పేర్కొంది.
రాష్ట్రంలో ఏ ప్రాంతానికి చెందిన పేదలకైనా రాజధాని అమరావతిలో 1134 ఎకరాల్లో ఇళ్ల స్థలాలు ఇచ్చేందుకు రాష్ట్ర ప్రభుత్వం నిర్ణయించింది. ఈ మేరకు గుంటూరు (550.65ఎకరాలు), ఎన్టీఆర్‌ (583.93 ఎకరాలు) జిల్లా కలెక్టర్లకు భూబదలాయింపు నిమిత్తం సీఆర్‌డీఏ కమిషనర్‌కు అనుమతిస్తూ పురపాలకశాఖ ప్రత్యేక ప్రధాన కార్యదర్శి వై శ్రీలక్ష్మి ఈఏడాది మార్చి 31న జీవో 45 జారీచేశారు. ఆ జీవోను సవాలు చేస్తూ రాజధాని ప్రాంత రైతులు యు.శివయ్య, కె.రాజేశ్‌, బెజవాడ రమేశ్‌బాబు, ఆలూరి రాజేశ్‌, కుర్రా బ్రహ్మ, కట్టా రాజేంద్రవరప్రసాద్‌ హైకోర్టులో వేర్వేరుగా వ్యాజ్యాలు దాఖలు చేశారు. మొన్న బుధవారం అమరావతి రైతులు, ప్రభుత్వం తరఫున వాదనలు విన్న ధర్మాసనం ఈ అంశంపై తీర్పును రిజర్వులో ఉంచింది. ఆయా పిటిషన్లపై ఉన్నత న్యాయస్థానం మంగళ, బుధవారాల్లో విచారణ చేపట్టి తీర్పును రిజర్వ్‌ చేసి నేడు వెలువరించింది.
