చిరంజీవి హీరోగా మెహర్ రమేష్ తెరకెక్కిస్తున్న భారీ చిత్రం ‘భోళా శంకర్’. ఇందులో చిరుకు జంటగా తమన్నా నటిస్తే.. చెల్లెలుగా కీర్తి సురేష్‌ నటించింది. ఇందులో సుశాంత్ ముఖ్యపాత్ర పోషించడం విశేషం. ఈ మూవీ నుంచి సాంగ్స్ అండ్ టీజర్ రిలీజ్ చేశారు. ప్రేక్షకాభిమానులు చిరంజీవిని ఎలా చూడాలి అనుకుంటున్నారో అలా చూపించారనే విషయం టీజర్ తోనే అర్థమైంది. దీంతో మెగా అభిమానులు మరింత ఆతృతగా భోళా శంకర్ కోసం ఎదురు చూస్తున్నారు. ఈ చిత్రాన్ని భారీ చిత్రాల నిర్మాత అనిల్ సుంకర నిర్మించారు.
ఆగష్టు 11న భోళా శంకర్ మూవీ థియేటర్లో రిలీజ్ కానుంది. అయితే.. నిర్మాత అనిల్ సుంకర ప్రమోషన్లను గట్టిగా ప్లాన్ చేశారు. అందులో భాగంగా హైదరాబాద్ విజయవాడ జాతీయ రహదారి పై ఉన్న రాజు గారి తోటలో భోళా శంకర్ 125 అడుగుల అతి పెద్ద కటవుట్ ని ఏర్పాటు చేయడం హాట్ టాపిక్ గా మారింది. టాలీవుడ్ హిస్టరీలో ఇంత పొడవున్న నిలువెత్తు కటవుట్ ని ఎప్పడూ పెట్టలేదని చెబుతున్నారు. దీనికి సంబంధించిన ఫోటోలు సోషల్ మీడియాలో వైరల్ గా మారాయి. గతంలో అక్కినేని అఖిల్ నటించిన ఏజెంట్ విషయంలో అనిల్ సుంకర మరీ ఇంత పెద్దది కాకపోయినా యాభై నుంచి డెబ్భై అడుగుల కటవుట్లను పెట్టించి అక్కినేని అభిమానులకు ఫుల్ జోష్ ఇచ్చారు.
అయితే.. భోళాశంకర్ కు ఎంతగా ప్రమోషన్స్ చేస్తున్నప్పటికీ.. అంతగా బజ్ అయితే రావడం లేదు. ఇది రీమేక్ మూవీ కావడం ఓ కారణమైతే.. ఫ్లాపుల్లో ఉన్న మెహర్ రమేష్ డైరెక్టర్ కావడం మరో కారణం కావచ్చు. అలాగే ట్రైలర్ లో రొటీన్ కంటెంట్ ఉందని, శ్రీముఖితో రొమాన్స్, కామెడీ పెట్టడం అస్సలు బాలేదని, ఎంత తమ్ముడైనా సరే పవన్ కళ్యాణ్ ని ఇమిటేట్ చేయడం నచ్చలేదని సీనియర్ ఫ్యాన్సే ట్విట్టర్, ఇన్స్ టాల్లో అసంతృప్తిని వ్యక్తం చేశారు. వాల్తేరు వీరయ్య బ్లాక్ బస్టర్ తో ఫుల్ జోష్ లో ఉన్న చిరు ఈ సినిమాతో మరో సక్సెస్ సాధించాలని అభిమానులు కోరుకుంటున్నారు. మరి.. భోళా శంకర్ ఎంత వరకు మెప్పిస్తాడో చూడాలి.
