నాని హీరోగా ఇటీవల వచ్చిన ‘దసరా’ సినిమా భారీ విజయాన్ని నమోదు చేసింది. సుధాకర్ చెరుకూరి నిర్మించిన ఈ సినిమాకి, శ్రీకాంత్ ఓదెల దర్శకత్వం వహించాడు. దర్శకుడిగా ఆయనకి ఇదే మొదటి సినిమా. మార్చి 30వ తేదీన థియేటర్లకు వచ్చిన ఈ సినిమా, బాక్సాఫీస్ దగ్గర భారీ వసూళ్లను నమోదు చేసింది. కీర్తి సురేశ్ కథానాయికగా నటించిన ఈ సినిమా, ఈ నెల 27వ తేదీ నుంచి నెట్ ఫ్లిక్స్ లో స్ట్రీమింగ్ కానుంది.
తెలంగాణ ప్రాంతంలోని సింగరేణి బొగ్గు గనుల నేపథ్యంలో ఈ సినిమా రూపొందింది. అక్కడి బొగ్గు గనులపై ఆధారపడిన జీవితాలు .. వాళ్ల ఆచారాలు .. ఈ మధ్యలో నడిచే ప్రేమకథగా ఈ సినిమా కొనసాగుతుంది. నాని ఇంతవరకూ పక్కా మాస్ లుక్ తో ఏ సినిమా చేయలేదు. అలా చేస్తే ఆయనను రిసీవ్ చేసుకోకపోవచ్చు అనే అభిప్రాయం కూడా అభిమానుల్లో ఉంది. అలాంటి అభిప్రాయాలను నాని ఈ సినిమాతో తుడిచేశాడు.
ఇక ఇంతవరకూ తెలుగులో గ్లామరస్ పాత్రలను మాత్రమే చేస్తూ వచ్చిన కీర్తి సురేశ్, ఈ సినిమాలో డీ గ్లామర్ రోల్ చేసింది. తెలంగాణ ప్రాంతంలోని ఒక మారుమూల గ్రామంలోని పద్ధతులకు తగినట్టుగా కనిపిస్తూ .. ఆ పాత్రలో ఆమె ఇమిడిపోయిన విధానం కూడా ఈ సినిమాకి అదనపు ఆకర్షణగా నిలిచింది. ఈ పాత్రను ఆమె ఎంతగా అర్థం చేసుకుంది అనడానికి, పెళ్లి కూతురుగా ఆమె వేసిన మాస్ స్టెప్పులే నిదర్శనం. థియేటర్ల నుంచి హిట్ టాక్ తెచ్చుకున్న ఈ సినిమాకి, ఓటీటీ వైపు నుంచి ఒక రేంజ్ రెస్పాన్స్ వస్తుందని ప్రత్యేకంగా చెప్పవలసిన పనిలేదు.
