గీతానంద్, నేహా సోలంకి హీరో హీరోయిన్లుగా నటిస్తోన్న చిత్రం ‘గేమ్ ఆన్’. ఏ క‌స్తూరి క్రియేష‌న్స్ ప్రొడ‌క్ష‌న్, గోల్డెన్ వింగ్ ప్రొడ‌క్ష‌న్స్‌ బ్యాన‌ర్స్‌ పై దయానంద్ ద‌ర్శ‌క‌త్వంలో రవి క‌స్తూరి ఈ సినిమాను నిర్మిస్తున్నారు. ఈ సినిమా టీజర్ రిలీజ్ ఈవెంట్ హైద‌రాబాద్‌లో జ‌రిగింది. ముఖ్య అతిథిగా హాజ‌రైన విశ్వ‌క్ సేన్ టీజ‌ర్‌ను విడుదల చేశారు. ఇంకా ఈ కార్య‌క్ర‌మంలో హీరో గీతానంద్, న‌టుడు ఆదిత్య మీన‌న్‌, దర్శకుడు దయానంద్, నిర్మాత రవి క‌స్తూరి, మ్యూజిక్ డైరెక్ట‌ర్ న‌వాబ్ గ్యాంగ్‌, అశ్విన్ – అరుణ్‌, సినిమాటోగ్రాఫ‌ర్ అర‌వింద్ విశ్వ‌నాథ‌న్ త‌దిత‌రులు పాల్గొన్నారు.
ఈ సంద‌ర్భంగా మ్యూజిక్ డైరెక్ట‌ర్స్ అశ్విన్ – అరుణ్‌ మాట్లాడుతూ… ‘‘ముందుగా హీరో గీతానంద్, దర్శకుడు దయానంద్, నిర్మాత రవి గారికి థాంక్స్. ఈ సినిమాలో ఓ రొమాంటిక్ ట్రాక్‌ను కంపోజ్ చేశాం. త్వ‌ర‌లోనే పాట‌లు విడుదల‌వుతాయి’’ అన్నారు.
విశ్వ‌క్ సేన్ మాట్లాడుతూ.. ‘‘కొత్త వాళ్లను ఎంక‌రేజ్ చేయ‌టంలో తెలుగు ప్రేక్ష‌కులు ఎప్పుడూ ముందుంటారు. 2013 -14 టైమ్‌లో నేను, దయానంద్ అంద‌రం 5డీ కెమెరాలతో షార్ట్ ఫిలింస్ చేసి మా ఐడియాస్‌ను షేర్ చేసుకుంటుండేవాళ్లం. ఇప్పుడు త‌ను కూడా సినీ ఇండ‌స్ట్రీలోకి అడుగు పెట్టాడు. గీతానంద్, ద‌యానంద్‌ల‌కు ఈ గేమ్ ఆన్ సినిమా చాలా పెద్ద విజ‌యాన్ని సాధించాల‌ని మ‌నస్ఫూర్తిగా కోరుకుంటున్నాను. నిర్మాత రవి కూడా మా కాలేజ్‌లోనే చ‌దివారు. గేమ్ ఆన్ టీజర్ చాలా బావుంది. రొటీన్ సినిమా అయితే కాదు. ఖచ్చితంగా థ్రిల్ అవుతారు ’’ అన్నారు.
