ఆ మధ్య అంజలి ప్రధానమైన పాత్రను పోషించిన ‘గీతాంజలి’ సినిమా భారీ విజయాన్ని అందుకుంది. తక్కువ బడ్జెట్ తో ఎక్కువ లాభాలను అందుకున్న సినిమాల జాబితాలో ఈ సినిమాకూడా చేరి పోయింది. అలాంటి ఆ సినిమాకి సీక్వెల్ గా ‘గీతాంజలి మళ్లీ వచ్చింది’ రూపొందింది. ఏప్రిల్ 11వ తేదీన థియేటర్లకు ఈ సినిమా వచ్చింది. శివ తుర్లపాటి దర్శకత్వం వహించిన ఈ సినిమా, ఇప్పుడు ఓటీటీ ఫ్లాట్ ఫామ్ పైకి రావడానికి రెడీ అవుతోంది.
‘గీతాంజలి మళ్లీ వచ్చింది’ సినిమా స్ట్రీమింగ్ హక్కులను ‘ఆహా’ వారు సొంతం చేసుకున్నారు. ఈ నెల 8వ తేదీ నుంచి ఈ సినిమాను స్ట్రీమింగ్ చేయనున్నట్టుగా అధికారికంగా ప్రకటిస్తూ, అందుకు సంబంధించిన పోస్టర్ ను వదిలారు. రేపటి నుంచి ఈ సినిమా స్ట్రీమింగ్ కానుంది. కెరియర్ పరంగా అంజలికి ఇది 50వ సినిమా. ఈ విషయాన్ని కూడా హైలైట్ చేస్తూ ఈ సినిమాను వదిలారు. అయితే థియేటర్స్ వైపు నుంచి ఆశించిన స్థాయిలో రెస్పాన్స్ రాలేదు.
గీతాంజలి ప్రేతాత్మను ఒక బొమ్మలో బంధించి ఒక చోట పాతిపెడతారు. చాలా కాలం తరువాత, అనుకోకుండా జరిగిన ఒక సంఘటన కారణంగా ఆ బొమ్మ బయటికి వస్తుంది. అప్పటి నుంచి ఆ బొమ్మలోని ప్రేతాత్మ తన చెల్లెలైన అంజలిని కలుసుకోవడానికి ప్రయత్నిస్తూ ఉంటుంది. అందుకు కారణం అంజలిని వెతుక్కుంటూ ఒక ప్రమాదం వస్తుండటమే. ఆ ప్రమాదం ఏమిటి? దాని నుంచి చెల్లెలిని కాపాడుకోవడానికి గీతాంజలి ఏం చేస్తుంది? అనేదే కథ.
