ఐసిసి టి-20 వరల్డ్ కప్ సూపర్-12 రౌండ్ రెండో మ్యాచ్ లో వెస్టిండీస్ పై ఇంగ్లాండ్ ఘనవిజయం సాధించింది. ఇంగ్లాండ్ బౌలింగ్ ధాటికి వెస్టిండీస్ బ్యాటింగ్ ఆర్డర్ కుప్పకూలింది, 14.2 ఓవర్లలో 55 పరుగులకే ఆలౌట్ అయ్యింది. ఇంగ్లాండ్ ఈ లక్ష్యాన్ని 8.2 ఓవర్లలోనే సాధించింది. అయితే వెస్టిండీస్ బౌలర్లు కూడా సత్తా చాటడంతో ఇంగ్లాండ్ నాలుగు వికెట్లు కోల్పోయింది.
దుబాయ్ ఇంటర్నేషనల్ క్రికెట్ స్టేడియంలో జరిగిన ఈ మ్యాచ్ లో ఇంగ్లాండ్ టాస్ గెలిచి బౌలింగ్ ఎంచుకుంది. వెస్టిండీస్ జట్టులో క్రిస్ గేల్ ఒక్కడే 13 పరుగులతో అత్యధిక స్కోరర్ కావడం గమనార్హం. ఇంగ్లాండ్ బౌలర్లలో ఆదిల్ రషీద్ నాలుగు, త్యమల్ మిల్స్; మొయిన్ అలీ చెరో రెండు; జోర్డాన్, వోక్స్ చెరొక వికెట్ పడగొట్టారు. ఆదిల్ రషీద్ 2.2 ఓవర్లలో కేవలం 2 పరుగులిచ్చి 4 వికెట్లు పడగొట్టారు.
ఇంగ్లాండ్ బ్యాట్స్ మెన్ లో ఓపెనర్ జోస్ బట్లర్ 24 పరుగులతో అజేయంగా నిలిచాడు. జేసన్ రాయ్-11; బెయిర్ స్టో-9 పరుగులు చేశారు. కెప్టెన్ మోర్గాన్ ఏడు పరుగులతో అజేయంగా నిలిచాడు.
రెండు కీలక వికెట్లు తీసిన మొయిన్ అలీకి ‘ప్లేయర్ అఫ్ ద మ్యాచ్’ అవార్డు దక్కింది.
