India beat Spain: 2021-22 మహిళల ఎఫ్.ఐ.హెచ్. ప్రో లీగ్ మ్యాచ్ లో నేడు ఇండియా 2-1తో స్పెయిన్ ను ఓడించింది. ఇంటర్నేషనల్ హాకీ ఫెడరేషన్ ఆధ్వర్యంలో నిర్వహిస్తున్న ఈ టోర్నీ లో ఇది 13వ మ్యాచ్. ఓడిశా రాజధాని భువనేశ్వర్ లోని కళింగ స్టేడియంలో జరిగిన ఈ మ్యాచ్ లో తొలి పావు భాగంలో ఎవరూ గోల్ సాధించాలేకపోయారు, రెండవ పావు భాగం 18వ నిమిషంలో స్పెయిన్ మొదటి గోల్ చేసి బోణీ చేసింది. ఆ కాసేపటికే ఇండియా తరఫున జ్యోతి ఫీల్డ్ గోల్ చేసి స్కోరు సమం చేసింది. ఆట మూడో పావు భాగంలో రెండు జట్లూ గోల్ చేయలేకపోయాయి. ఆట చివరి భాగంలో 52వ నిమిషం వద్ద క్రీడాకారిణి నేహ ఇండియాకు రెండో గోల్ అందించి జట్టును ఆధిక్యంలో నిలిపింది, ఆ తర్వాత స్పెయిన్ మరో గోల్ చేయకుండా ఇండియా నిలువరించగలిగింది.
ఈ టోర్నీలో ఇప్పటికి మూడు మ్యాచ్ లు ఆడిన ఇండియా మహిళా జట్టు అన్నింటిలోనూ విజయం సాధించింది. రేపు ఇదే వేదికగా స్పెయిన్ తో రెండో మ్యాచ్ ను కూడా ఇండియా ఆడనుంది.
