ఐపీఎల్ లో నేడు జరిగిన మ్యాచ్ లో చెన్నై సూపర్ కింగ్స్ పై ఢిల్లీ క్యాపిటల్స్ విజయం సాదించింది. దుబాయి ఇంటర్నేషనల్ స్టేడియం వేదికగా జరిగిన ఈ మ్యాచ్ లో టాస్ గెల్చుకున్న ఢిల్లీ కెప్టెన్ రిషభ్ పంత్ బౌలింగ్ ఎంచుకున్నాడు. సూపర్ ఫామ్ లో ఉన్న చెన్నై ఓపెనర్లు రుతురాజ్ గైక్వాడ్, డూప్లెసిస్ లు ఈ మ్యాచ్ లో త్వరగా ఔటయ్యారు. చెన్నై ఆటగాళ్ళలో అంబటి రాయుడు-55 (43బంతుల్లో 5ఫోర్లు, 2సిక్సర్లు) రాణించాడు. చాలా రోజుల తర్వాత జట్టులోకి వచ్చిన రాబిన్ ఊతప్ప-19, కెప్టెన్ ధోనీ-18 పరుగులతో పర్వాలేదనిపించారు. నిర్ణీత 20 ఓవర్లలో 5 వికెట్ల నష్టానికి 136 పరుగులు చేసింది. ఢిల్లీ బౌలర్లలో అక్సర్ పటేల్ 2 వికెట్లు పడగొట్టగా, నార్జ్, ఆవేష్ ఖాన్, రవిచంద్ర అశ్విన్ లకు తలా ఒక వికెట్ దక్కింది.
చెన్నై బౌలర్లు సమిష్టిగా రాణించడంతో ఢిల్లీ కూడా లక్ష్య ఛేదనలో ఆపసోపాలు పడాల్సి వచ్చింది. ఓపెనర్ శిఖర్ ధావన్-39 (35 బంతుల్లో 3ఫోర్లు, 2సిక్సర్లు); చివర్లో హెట్మెయిర్-28 నాటౌట్ (18బంతుల్లో 2ఫోర్లు, 1సిక్సర్) రాణించడంతో మరో రెండు బంతులు మిగిలి ఉండగానే మూడు వికెట్లతో విజయం సాధించింది. చెన్నై బౌలర్లో శార్దూల్ ఠాకూర్, రవీంద్ర జడేజా చెరో రెండు వికెట్లు, దీపక్ చాహర్, హాజెల్ వుడ్, బ్రావో తలా ఒక వికెట్ పడగొట్టారు.
ఇద్దరు కీలక చెన్నై బ్యాట్స్ మెన్ ను అవుట్ చేసిన ఢిల్లీ బౌలర్ అక్సర్ పటేల్ కు ‘ప్లేయర్ అఫ్ ద మ్యాచ్’ అవార్డు లభించింది
