జీవితంలో ఏదో సాధించాల‌ని మ‌న‌కు చెప్పే పాత్ర‌ల‌ను వెండితెర పై చూడ‌టానికి ప్రేక్ష‌కులు ఎప్పుడూ ఇష్ట‌ప‌డ‌తారు. అలాంటి పాత్రల‌తో రూపొందిన చిత్ర‌మే ‘విమానం’. స‌ముద్ర ఖని, మాస్ట‌ర్ ధ్రువ‌న్‌తో పాటు ఇందులో మీరా జాస్మిన్‌, అన‌సూయ భ‌ర‌ద్వాజ్‌, రాహుల్ రామ‌కృష్ణ, ధ‌న్‌రాజ్ త‌దిత‌రులు కీల‌క పాత్ర‌ల్లో న‌టిస్తున్నారు. ఈ చిత్రానికి శివ ప్రసాద్ యానాల దర్శకత్వం వహిస్తున్నారు. చ‌ర‌ణ్ అర్జున్ సంగీతాన్ని అందిస్తున్నారు.
ద్విభాషా చిత్రంగా తెలుగు, తమిళ భాషల్లో ఆడియెన్స్‌ను అల‌రించ‌నుందీ సినిమా. వైవిధ్య‌మైన పరిస్థితులు, వాటికి సరిపోయేటువంటి సున్నిత‌మైన పాత్ర‌ల‌ను ఈ చిత్రంలో మ‌నం చూడొచ్చు. విమానం సినిమాలో వెర్స‌టైల్ యాక్ట‌ర్‌ స‌ముద్ర ఖని అంగ వైక‌ల్యంతో బాధ‌ప‌డే మ‌ధ్య వ‌య‌స్కుడిగా, భార్య లేక‌పోయినా పిల్లాడిని జాగ్ర‌త్త‌గా చూసుకునే వీర‌య్య అనే తండ్రి పాత్ర‌లో న‌టించారు. జీ స్టూడియోస్‌, కిరణ్ కొర్ర‌పాటి క్రియేటివ్ వ‌ర్క్స్ బ్యాన‌ర్స్ పై ఈ సినిమా రూపొందుతోంది.
విమానం ప్రోమోను మేక‌ర్స్ విడుదల చేశారు. ప్రోమోను గ‌మ‌నిస్తే.. అందులో తండ్రీ కొడుకుల మ‌ధ్య అనుబంధం క‌నిపిస్తుంది. రాజు అనే అనే అబ్బాయి త‌న తండ్రి పాత్ర‌లోని స‌ముద్ర ఖ‌నితో మాట్లాడుతూ.. ఓసారైనా త‌న‌ని విమానం ఎక్కించ‌మ‌ని అడుగుతుంటాడు. విమానం ఎక్కటానికి ఎందుకంత ఇష్టం నీకు అని అడిగితే పై నుంచి చూస్తే అన్నీ చిన్న‌గా క‌నిపిస్తాయ‌ని అంటాడు. అయితే బాగా చ‌దువుకుంటే పెద్ద‌య్యాక నువ్వే విమానం ఎక్కొచ్చ‌ని తండ్రి అంటాడు. ఇందులో సున్నితంగా, చ‌క్క‌గా తండ్రీ కొడుకుల మ‌ధ్య ఉన్న భావోద్వేగాల‌ను ప్రోమోలో చ‌క్క‌గా ఎలివేట్ చేశారు రైట‌ర్, డైరెక్ట‌ర్ శివ ప్రసాద్ యానాల. జూన్ 9న ఈ చిత్రాన్ని విడుదల చేయడానికి ప్లాన్ చేశారు. ఈ మూవీ ప్రొమో విశేషంగా ఆకట్టుకుంటుంది. మరి.. సినిమా కూడా అన్ని వర్గాల ప్రేక్షకులను అలరించి విజయం సాధిస్తుందేమో చూడాలి.
