సిరివెన్నెలతో.. సరదాగా కాసేపు..

ట్విట్టరు ప్రపంచంలోకి అడుగు పెట్టి సంవత్సరం దాటింది. కాసేపు సరదాగా మీ అందరితో ముచ్చటించాలనిపించింది. అందుకే, జూన్ 5 సాయంత్రం 7 PM నుండీ 8 PM వరకూ “నా గురించి, నా సాహిత్యం గురించి” #AskSirivennela పేరిట మీరు అడిగే ప్రశ్నలకు వీలైనంత మేర సమాధానాలిస్తాను. అని ప్రముఖ సీనియర్ గీత రచయిత సిరివెన్నెల సీతారామశాస్త్రి ప్రకటించగానే.. ట్విట్టర్ లో అనూహ్యమైన స్పందన వచ్చింది. సిరివెన్నెలతో ట్విట్టర్ లో జరిగిన సంభాషణ మీ కోసం… మొదలెడదామా? #AskSirivennela

కాశీపట్నం రామారావు i.e కారా మాష్టారు గారి గురించి చెప్పండి సార్
సిరివెన్నెల: కథా యజ్ఞానికి ప్రధాన ఋత్విజుడు కాళీపట్నం రామారావు మాస్టారు. జీవితం అంతటినీ కథ అనే సాహితీ ప్రక్రియకు అంకితం చేసిన మహా వ్యక్తి. కథని పదికాలాల పాటు పచ్చగా ఉంచడానికి పెంచడానికి తన యాగఫలాన్ని ధారపోసి వెళ్లారు.

అప్పటిలో ఉన్న పాటలూ సినిమాలూ యిప్పుడు ఎందుకు రావడం లే గురువూ గారు ?
సిరివెన్నెల: ప్రతీ కాలంలోనూ పాటలూ, సినిమాలూ అన్నీ అన్నిరకాలుగానూ, ఉన్నాయి. ఏ రకం అభిరుచి ఉన్నవాళ్ళు దాన్ని ఆస్వాదిస్తారు, భిన్నంగా ఉన్నదాని గురించి విసుక్కుంటారు. మన అభిరుచికి అనుగుణంగా ఉన్న పాటలు ఎంచుకునే అవకాశం మనకు ఉంది. విసుక్కునే చేదు మాని, మన అభిరుచిని ఆస్వాదించే తీపిని చవిచూద్దాం.

త్రివిక్రమ్ గారు మిమ్మల్ని రాత్రి ఉదయించే సూర్యుడు అని సంబోధించడానికి కారణం ఏంటి గురువు గారూ….!?
సిరివెన్నెల: మనకు ఇష్టమైన విషయాన్ని, మనకు తోచిన విధంగా వ్యక్తీకరిస్తాం. నేను సాధారణంగా రాత్రిపూట పనిచేస్తాను కాబట్టి దానిని ఆయన భాషలో ఆయన వ్యక్తీకరించారు.

గురువుగారు, ‘లైఫ్ ఆఫ్ రామ్’ పాట ఒక అద్భుతం. ఆ పాట లో మీకు నచ్చిన ఒక లైన్ గురించి…
సిరివెన్నెల: “ఇలాగే కడదాకా ఒక ప్రశ్నై ఉండాలనుకుంటున్నా
ఏదో ఒక బదులై నను చెరపొద్దని కాలాన్ని అడుగుతు ఉన్నా”
అది నా ఆలోచనా ప్రపంచానికి కేంద్ర బిందువు

మీరు రాసిన పాటల్లో మిమ్మల్ని అత్యధికంగా శ్రమ పెట్టిన పాట ఏది?
సిరివెన్నెల: పాట వచ్చే క్రమంలో శ్రమ అనే మాటకు చోటు లేదు.

మీకు నచ్చిన సినిమా, మీ దృష్టిలో సినిమా అంటే..?
సిరివెన్నెల:లిస్టు చాలా పెద్దది, “పిట్టభాష” సరిపోదు.
ఇక – కథని చెప్పడం, చూపడం – రెండు ప్రక్రియలు. చెప్పడం సులభం, చూపడం కష్టం. సినిమా ఆ పని చేస్తుంది. కావ్యేషు నాటకం రమ్యం అని అందుకే అన్నారు. రక్తమాంసాలున్న పాత్రలతో కథని చూపడం అనే పనిచేసే సినిమా అన్నది నాకు ఇష్టం.

మీకు బాగా నచ్చిన కవి ఎవరు ?
సిరివెన్నెల: వాల్మీకి

ఇన్నేళ్ల మీ సాహిత్య ప్రయాణంలో మీరు ప్రయోగించిన మీరు గర్వించదగ్గ పదం లేదా వాక్యం .?
సిరివెన్నెల: “ప్రశ్న – కొడవలిలా ఉండి కుత్తుక కోస్తూ వెంటపడే ప్రశ్న”

దైవాన్ని నిర్వచించాలంటే ?
సిరివెన్నెల: .తనను తాను నిర్వచించుకోగలగాలి

మీ పాటల్లో మీరు గర్వించే పాట..?
సిరివెన్నెల:  ప్రతీ పాట

కీశే. వేటూరి సుందరమూర్తి గారికి మీరు రాసిన పాటల్లో ఏ పాట అంటే ఇష్టం ? ఆయన మిమ్మల్ని మెచ్చుకున్న  సందర్భం?
సిరివెన్నెల: చాలా ఉన్నాయని వాళ్ళూ వీళ్ళూ అన్నారు. “నీలాల కన్నుల్లొ సంద్రమే, నింగి నీలమంతా సంద్రమే” అన్న పాటను ఆయన అత్యంత ఆత్మీయంగా విశ్లేషించి మెచ్చుకున్నారని బాలు అన్నయ్య నాకు చెప్పారు.

మీరు ఎక్కువ సమయం ఏమి చేస్తూ ఉంటారు మెలుకువ ఉన్నంత సేపు సర్?
సిరివెన్నెల: ఇప్పుడైతే ఎక్కువగా ఐపాడ్‌తో గేమ్స్ ఆడుతూ కాలక్షేపం చేస్తున్నాను.

ఫిలాసఫీ చూపులో ప్రపంచమో భూటకమా?
సిరివెన్నెల:  మనని జీవితం అనే ప్రశ్న వెంటాడి వేధించకపోతే, ఊరికే తెలివితేటలతో మాటాడాల్సి వస్తే, ఆ వాచాలతలో బూటకమే!

మీరు ప్రజలకు చదవమని చెప్పే ఐదు పుస్తకాలు ఏమిటి?
సిరివెన్నెల: నేను ప్రజలకు ఫలానా పుస్తకం చదవమని ఎప్పుడూ చెప్పలేదు. అది జీవితాన్ని తీవ్రమైన అక్కరతో బ్రతకడం అలవాటు చేసుకుంటే ఎప్పుడు ఏది చదవాలో, ఎప్పుడు ఏది కావాలో జీవితమే తెచ్చి ఇస్తుంది. “ఊరికే పేజీలు తిరగేసే బ్రెయిన్ లైబ్రరీలో బీరువాలాంటిది.”

ఇన్నేళ్ళుగా వ్రాస్తూ వచ్చారు, రాయడానికి ఎన్నో కారణాలుండుంటాయి. ఇప్పటిదాకా నిరంతరాయంగా మిమ్మల్ని, మీ కలాన్ని నడిపిస్తున్న స్పూర్థి ఏంటి?
సిరివెన్నెల: అత్యంత తీవ్రతతో ప్రతీ క్షణాన్నీ గమనించడం, ప్రతీ నిమిషంతో స్పర్ధించడం – అదే నా ప్రేరణ.

తెలుగులో ట్వీట్ చేసిన వారికే రిప్లై ఇస్తున్నారు..?
సిరివెన్నెల: తెలుగులోనే నన్ను నేను స్పష్టంగా వ్యక్తపరుచుకోగలను అన్న కారణం వల్ల. అలానే టింగ్లీషు నాకు సరిగా రాదు.

ఏకాగ్రతకు మీ నిర్వచనం..?
సిరివెన్నెల:  నేను తప్ప ఇంకేం కనిపించకపోవడం, నేను తప్ప ఇంకేం అనిపించకపోవడం.

మీకు నచ్చిన మ్యూజిక్ డైరెక్టర్..?
సిరివెన్నెల: ఒక వ్యక్తి ఉండరు, వ్యక్తీకరణ ఉంటుంది. ప్రతీ ఒక్కరూ ఎప్పుడో అప్పుడు ఏదో ఒకటి గొప్పగానే చేస్తారు. ఒక్క మ్యూజిక్ విషయంలోనే కాదు, ఏ ప్రతిభా వ్యక్తీకరణకైనా ఇదే వర్తిస్తుంది.

చెంచాడు భవసాగరాన్ని ఈదడానికి అవశ్యమైన సాధనాలేంటి ?
సిరివెన్నెల: ఆమాట అన్నది అమృతం సీరియల్ రూపకర్త గుణ్ణం గంగరాజు. మీ ప్రశ్నకు సమాధానం ఏమిటి అంటే – “భవసాగరాన్ని ఒక చెంచాడే అనుకోగలగడం”

రచయిత కి ఉండాల్సిన మొదటి లక్షణం ఏంటి గురువు గారు?
సిరివెన్నెల: తానేం చెప్తున్నాడో, ఎందుకు చెప్తున్నాడో తనకి స్పష్టంగా తెలియడం.

ద‌ర్శ‌కుడు ఓ సంద‌ర్భాన్ని వివ‌రించిన‌ప్పుడు.. అందులో మీవైన భావాలు, అభిప్రాయాలూ జోడించాల‌ని చూస్తారా?  లేదంటే ద‌ర్శ‌కుడి ఆలోచ‌న‌లే… మీ పాట‌కు ముడిస‌రుకుగా వాడుకుంటారా?  మీ భావాలు సంద‌ర్భాన్ని డామినేట్ చేయ‌కుండా ఉండ‌డానికి మీరు చేసే ప్ర‌త్యేక‌మైన క‌స‌ర‌త్తేంటి?
సిరివెన్నెల:  దర్శకుడు నాకు భిన్నంగా ఉన్నాడని అని అనుకోకపోవడం. అతని భావాలను, ఆలోచనలు నావిగా చేసుకుని చెప్పాలనే ప్రయత్నం చేయడం. కాస్త ఇటుఅటు అయినా ప్రతీ ఒక్కరూ మనిషే, ప్రతీ భావమూ మనిషి భావమే.

మీ సాహిత్యం మీద మక్కువతో ఒక ప్రశ్న.. మళ్ళీ తెలుగు సాహిత్యపు స్వర్ణ యుగం చూసేదెప్పుడు ఆండీ.. రాను రాను కాస్త పద ప్రయోగాలు తగ్గిపోతూ వచ్చి ఇప్పుడు రమారమి ఇంగ్లీషు లేదా యాస పాటలు వచ్చేశాయి.. మీ ప్రయోగాలను మరియు సప్తపది లాంటి అద్భుత కావ్యాలను ఎప్పుడు చూడగలం
సిరివెన్నెల:  సాహిత్యానికి ముందు తెలుగు అనో, మరోటనో చేర్చకూడదు. భాషతో సంబంధం లేనిది భావం. భావాలు అనేవి అన్ని విధాలుగానూ ఉంటాయి.
ధాన్యం పొట్టుతో పాటే ఉంటుంది. దూగర దులిపి, గింజను ఏరుకోవడం ఎప్పుడూ జరగాల్సిన పనే. ఎప్పుడూ మనకు కావాల్సింది ఉంటుంది. మనం చేయాల్సింది ఏరుకోవడమే.

దేవులపల్లి గారి సాహిత్యంలో మీకు బాగా నచ్చిన కవిత ?
సిరివెన్నెల:  మ్రోయించకోయి మురళీ, మ్రోయించకోయి కృష్ణా “తియ్య తేనియ బరువు మోయలేదీ బరువు” –
వివరణ అనేది దాహం తీర్చుకునేవారి పాత్రతను బట్టి, పాత్రను బట్టి ఉంటుంది.

“సామజ వర గమనా” అన్న సమాసం వింటే త్యాగరాజస్వామి గుర్తుకు వచ్చేవారు. ఇప్పుడు అందమైన యువతి ఊరువులు, వాటిని మోహించే యువకుడు మదిలో మెదులుతున్నారు. తప్పంతా సామాజికుడిదేనంటారా?
సిరివెన్నెల: దృశ్యంలో లేదు, చూసే కన్ను వెనకాల ఉన్న సంస్కారంలో ఉంది.

సర్… మీరు రచించని ఇతర పాటలలోని మీరు ఎంతగానో మెచ్చిన పాట ఏది…!?
సిరివెన్నెల: చాలా! ప్రతీ ఒక్కరూ ఏదోక గొప్ప పాట రాసే ఉంటారు.

మీరు హేతువాది అయినప్పటికీ దేవుడు ఉన్నాడని మీరు ఎలా నమ్ముతారు ?
సిరివెన్నెల: నేనున్నాను గనుక!

రచయితలు-  సంఘికీకరణ ( socialization) పైన మీ అభిప్రాయం ఏమిటి?
సిరివెన్నెల:“సరిగా చూస్తున్నదా నీ మది…  గదిలో నువ్వే కదా ఉన్నది…
చుట్టూ అద్దాలలో విడివిడి రూపాలు నువ్వు కాదంటున్నది” No man is island

మీరు రాసిన పాటల్లో మీకు వ్యక్తిగతంగా సంతృప్తినిచ్చిన రెండు పాటలు చెప్పండి సర్.కొస మెరుపు: బిడ్డల్లో ఏ బిడ్డంటే ఇష్టం అని అడిగితే ఏం చెప్పను హరీషు! అని కప్ప దాటవేత సమాధానం ఇవ్వకండి దయచేసి..
సిరివెన్నెల: “నా పాట పంచామృతం.. నా గానాన గీర్వాణి స్నానాలు శాయంగ”  “సృష్టి కావ్యమునకిది భాష్యముగా విరించినై విరచించితిని”

తెలుగు భాష మీద పట్టు లేని కొంతమంది గాయకులు మీ కలం నుండి జారిన అద్భుత పాటలను ఖూనీ చేసినట్టు గానీ, సంగీత దర్శకులు ఆ విషయాన్ని విస్మరించిరించినట్టు గానీ మీకెప్పుడైనా అనిపించిందా సార్!!? ఉదాహణకు: S/O సత్యమూర్తి సినిమాలో…చూపులునల్లానా Sir?? చూపులనలానా Sir??
సిరివెన్నెల:  బియ్యంలో రాళ్ళు ఏరుకుని వండుకుంటాం, అన్నంలో తగిలిన రాళ్ళను పక్కన తీసిపెట్టి తింటాం.
“చూపులను అలా తొక్కుకు వెళ్ళకు” అని మీకూ తెలుసు, ఎవరినో ఎందుకు నిందించడం!

లిరిక్స్ రాయడానికి మీకు ప్రత్యేకంగా ఫేవరేట్ ప్లేస్ ఉందా.?
సిరివెన్నెల: నా బుర్రలో అలజడి!

యుగయుగాలుగా ఏ మృగాల కన్నా ఎక్కువ ఏం ఎదిగాం? నిజమా?
సిరివెన్నెల:  తప్పే! మృగాలను అవమానించకూడదు.

ప్రేమ పాటలు అద్భుతంగా రాసే మీకు, కావలసిన  ప్రేరణ, స్ఫూర్తి ఎవరి నుండి కలుగుతుంది?
సిరివెన్నెల: బ్రతుకంతా ప్రేమే! ప్రేమ నుండే ప్రేమ వస్తుంది!

పాటలో ‘ నిరాశ / నిస్పృహ లు ‘ వ్యక్తపరిచే  సందర్భంలో కూడా, ఆ స్టేట్ ఆఫ్ మైండ్ ను దాటి ఓ ఆశావాద కోణం కూడా ఇనుమడింపజేస్తూ వచ్చారు. ఆ తూకం పాటించడానికి గల ప్రత్యేకమైన కారణం ఏదైనా ఉందా గురువుగారు ?
సిరివెన్నెల: కాలం గాయాన్ని మాన్పుతుంది అన్న సత్యాన్ని గుర్తిస్తే ఏడుపైనా, నవ్వైనా, మరేదైనా మనం చెయ్యాలనుకున్నంత సేపు చెయ్యలేం. ఇది ముందే తెలుసుకుంటే, భావాల ఉధృతిని మోతాదు మించనివ్వం. “నిన్న రాత్రి పీడకలను నేడు తలుచుకుంటూ నిద్ర మానుకోగలమా.. ఎంత మంచి స్వప్నమైనా అందులోనే ఉంటూ లేవకుండ ఉండగలమా”

గురువు గారు మీరు మా యూత్ కి ఇచ్చే సందేశం ఏంటి?
సిరివెన్నెల: యూత్ అనేది ఏజ్ కాదు. అదొక ఫేజ్. అదొక స్టేజ్. అది తెలుసుకుంటే – Youth itself is a message.

మీరు గాయం Movie లో పాడిన పాట నాకు చాలా ఇష్టం Song… ఇలాంటి పాట మళ్ళీ రాయాలని ఎందుకు అనిపించలేదు.. ?
సిరివెన్నెల: అలాంటి భావాలున్నటువంటి మిగిలిన పాటలను మీరెందుకు పరిశీలించరు? జిరాక్స్ కాపీని ఎందుకు అడుగుతున్నారు?

సిరివెన్నెల గారు పాటల రచయిత కాకపోయి ఉంటే?
సిరివెన్నెల: జరగాల్సిందే జరిగింది. జరగాల్సిందే జరుగుతుంది.

తెలుగు భాష గొప్ప తనం ఏంటి?
సిరివెన్నెల: ఏ భాష ప్రత్యేకత ఆ భాషదే! అసలు సమస్య ఏమిటంటే మనుషులందరినీ కలపాల్సినటువంటి భాష… “లు” తగిలించుకుని ఇన్నిగా ఎందుకుండాలి?

మీకు బాగా నచ్చిన పుస్తకం.?
సిరివెన్నెల: నా స్వల్ప అనుభవానికి సంబంధించి ఇష్టమైనవి రెండు పుస్తకాలు. ఒకటి భగవద్గీత, రెండు – ఖలీల్ జిబ్రాన్ రాసిన “ద ప్రాఫిట్”

ప్రస్తుతానికి ఆగుదాం! అడపాదడపా మనం ఇలా కలుసుకుని మాటా మాటా అనుకుందాం!  బావుంటుంది!!!

– సిరివెన్నెల సీతారామశాస్త్రి