పాన్ ఇండియా స్టార్ ప్రభాస్ – క్రేజీ హీరోయిన్ పూజా హేగ్డే జంటగా నటిస్తున్న భారీ పిరియాడిక్ లవ్ స్టోరీ రాధేశ్యామ్. ఈ చిత్రానికి ‘జిల్’ ఫేమ్ రాధాకృష్ణ కుమార్ దర్శకత్వం వహిస్తున్నారు. ఈ క్రేజీ మూవీ అప్ డేట్స్, రిలీజ్ డేట్ కోసం అభిమానులు ఆతృతగా ఎదురు చేస్తున్నారు. నేడు కృష్ణాష్టమి సందర్భంగా ఈ సినిమాకి సంబంధించిన స్పెషల్ పోస్టర్ ను విడుదల చేశారు. నెమలి పింఛాలతో కూడిన నీలి రంగు గౌనును ధరించిన పూజా హేగ్డే పియానో వాయిస్తుండగా, జెంటిల్ మ్యాన్ లుక్ లో ప్రభాస్ ఆమె వైపు చిరునవ్వులను చిందిస్తూ ఆప్యాయంగా చూస్తున్న ఈ పోస్టర్ విశేషంగా ఆకట్టుకుంటుంది.
ఇందులో రెబల్ స్టార్ కృష్ణంరాజు కీలక పాత్ర పోషిస్తున్నారు. ఆయన పాత్ర నిడివి తక్కువ అయినప్పటికీ.. కథను మలుపు తిప్పే పాత్ర అని సమాచారం. గోపీకృష్ణ మూవీస్ పతాకం పై రెబల్ స్టార్ కృష్ణంరాజు – టీ సిరీస్ భూషణ్ కుమార్ సమర్పణలో యూవి క్రియేషన్స్ సంస్థ ఈ సినిమాను నిర్మిస్తుంది. భారీ బడ్జెట్ తో రూపొందుతోన్న ఈ చిత్రానికి వంశీ, ప్రమోద్, ప్రశీద నిర్మాతలు. ఇక ఈ మూవీ రిలీజ్ విషయానికి వస్తే… జులై 30న ఈ సినిమాని విడుదల చేయాలనుకున్నా…. రోనా సెకండవ్ వేవ్ కారణంగా వాయిదా పడింది. సంక్రాంతి కానుకగా 2022లో జనవరి 14న సినిమాను విడుదల చేస్తున్నట్లు దర్శక నిర్మాతలు ప్రకటించారు.
